Accessibility links

Кайнар хәбәр

Rusiä töbäklärendä tatar telendä çığuçı matbuğatnı yazdırıp aluçılarnıñ sanı bik az


Rusiä töbäklärendä tatar telendä çığuçı matbuğatnı yazdırıp aluçılarnıñ sanı bik az

Nihäyät, Rusiä töbäklärendä tatar telendä çığuçı matbuğatqa yazılunıñ näticäläre iğlan itelde. Döresen äytergä kiräk, alar ber dä ğorurlanırlıq tügel. Kiresençä, bu sannarğa qarasañ, tatar matbuğatınıñ ayanıç xäle bik yaxşı sizelä. Xäyer, tatar xalqınıñ üzeneñ dä xäle möşkellänep kilgändä, tatar telle matbuğat qına çäçäk ata almıy şul inde. Äydägez, şuşı yılnıñ yartıyıllığına yazılunıñ näticäläre belän tanışıp kitik äle. Yazıluçılar sanı buyınça berençe urınnı hiçşiksez «Yuldaş» gäcite bili. Anıñ Rusiädä 26 meñgä yaqın uquçısı bar. Bu gäcitne Tatarstan belän kürşe-tirädä torğan Çuwaşstan, Başqortstan respublikalarında ğına tügel, ä Orenbur, Perm ölkälärendä, xättä Xantı-Mansi, Yamal-Nenes okruglarında da uqıylar ikän. Şulay uq liderlar arasında, «Yuldaş»tan bik artta qalıp bulsa da, xatın-qızlar öçen çığa torğan «Söyembikä», balalar öçen basıla torğan «Salawat küpere» jurnalların, «İman», «Sälämätlek» gäcitlären atap bula. Alar 2-3 meñnän artıq yazıluçılarğa iä. Alardan soñ «Tatarstan yäşläre» gäcite tora. Gäcitneñ ğadi sannarın 1600 keşe, ä atnalığın ber meñnän artıq keşe aldırıp uqu telägen beldergän. Şulay itep, «Tatarstan yäşläre» uquçılarınıñ ğomümi sanı 3 meñgä yaqın. «Qazan utları» jurnalın isä bıyıl Rusiäneñ törle töbäklärendä 1600 keşe uqıyaçaq. Qalğan gäcit-jurnallarnıñ uquçılar sanı ber meñgä dä citmi. Döresräge, alarnıñ küpçelegeneñ yazdırıp uquçılar sanı 200, 300-dän artmıy. Läkin balalar öçen çığa torğan «Sabantuy» häm «Sabıyğa» basmalarınıñ sanı 800 tiräse. «Salawat küpere»neñ bu isemlektä berençe urınnarda torğanın da isäpkä alıp, bälki äle tatar matbuğatınıñ kiläçäge alay uq ömetsez tügelder, dip uylıysı kilä.

«Azatlıq» radiosı öçen Tatarstan xäbärläre belän Qazannan Gölnaz İlgizär
XS
SM
MD
LG