Accessibility links

Кайнар хәбәр

Mäskäwdä «ä» dielsä, Qazanda «cä» dielä başladı…


Tatarstanda pänceşämbe könne dönya kürgän räsmi xäbärlärdä, älbättä, Mäskäwdä Rusiä Prezidentı Vladimir Putin räislegendä uzğan Däwlät Şurası telgä alına. Mäğlüm ki, anda Mintimer Şäymiev qatnaştı. Ä Rusiä Däwlät Şurasınıñ töp teması saw-sälamät tormış räweşe, fizkul'tura häm sport buldı. Annan aldaraq Rusiäneñ iñ yuğarı xaqimiäte qarawçısız qalğan suqbay balalarnı kön üzäge probleması itep kürsätkän ide. Könendä ük diärlek, Tatarstanda Rusiäneñ bu başlanğıçlarına reaksiä buldı. Ministrlar Kabinetı qarawçısız balalar temasına brifing bağışladı. Uzğan yıl Tatarstanda militsiägä uramnardan totıp 31 meñ bala kiterelüe turında äytelde. Bigräk tä şähärlärdä suqbaylıqta telänep yörüçe balalar sanı yıldan yıl arta.

Ä inde sälamät tormış räweşenä kilgändä, monda da mäğlümat çaralarında televizion yañalıqlarda qayber şähärlärdä, qayber rayonnarda balalarnı sälamät itep tärbiäläw eşläre inde küptän başlanuı, bu ölkädä qazanışlar turında xisap totu küreneşläre sizelde. Bu xällär küplärgä torğınlıq yılların xäterlätte. Qırıq eş qırıqqa yarılıp yatqan waqıtta problemalarnıñ isäben cuygan ber mälne partiäneñ Üzäk komitetı berär problemanı kütärep çığa ide. Yä bulmasa, yäşlärne patriotik tärbiäläw, yä bulmasa, pioneriäne canlandırıp cibärü. Şunda uq bu başlanıçlarğa töbäklärdän reaksiä bula ide. Cıyılışlar ütkärü, rezolyutsiälär çığaru häm tizräk inde şular-şular eşlände, dip xisap totular.

Fizkul'tura, sport mäsäläsenä kilgändä, här mäktäptä, xätta zurıraq awıl mäktäplärendä üzenä kürä cihazlanğan ber stadion, mäktäp binasında keçkenä genä bulsa da, sport zalı bula ide. Cäy-yaz ciñel atletika buyınça mäktäp, rayon spartakiadaları, ä qışın çañğı yarışları ütkärelä ide. Mäktäplärdä «Будь готов к труду и обороне», yäğni «Xezmätkä häm Watannı saqlawğa äzer bul», «Готов к труду и обороне», yäğni «Xezmätkä häm Watannı saqlawğa äzer» digän normalar elenep tora ide. Häm bu normalarnı ütärgä tırışmağan malaylar-qızlar yuq ide. Xäzer mäktäplärdä sport, fizkul'tura nixäldä ikäne küz aldında. Xäyer, küpçelek ata-analar xäzerge zamanda balaların fizkul'tura däreslärennän azat itüne izge buraç, dip sanıy. Berençedän, balalarnıñ sälämätlege şul qadär genä. İkençedän, fizkul'tura däresläreneñ sıyfatı niqadär.

Şulay da soñğı yıllarda Tatarstanda balalarnı fizik tärbiäläwgä iğtibar arttı. Çönki yäşlär arasında eçüçelek, narkomaniä, cinäyätçelek däwlät däräcäsendä problemağa äylände. İnde xäzer yäşlärne ciñel atletika, çañğı yarışları belän genä qızıqtırıp bulırmı — monısı zur soraw.

Döres, professional' sport respublikada bik yuğarı däräcädä. Xokkey, basketbol komandaları xalıqara yarışlarda qatnaşa, uñış qazana. Läkin professional' sport — ul küpçelek öçen tügel. Anda bik azlar ğına elägä. Äle, citmäsä, küp närsäne aqça xäl itä. Tatarstannıñ «Aq Bars» xokkey, «Uniks» basketbol komandalarında legionerlar şaqtıy.
XS
SM
MD
LG