Qazanda “Tatar teleneñ dusları” digän yaña ictimaği oyışma eşli başladı

Tuğan telne üsterü xalıqara oyışmalardan häm däwlätlärdän genä tügel, ä millätlärneñ üz ixtıarınnan da tora. Qayber oçraqlarda üz teläge belän ata-babalar telennän, millättän waz kiçälär. Yäki keşelärneñ tuğan teldä söyläşü, belem alu xoquqları bozıla. Mäktäplär, däresleklär, metodik äsbaplar, milli matbuğat citmäw dä tuğan telneñ qısıluına kiterä. Uqıtuçılarnı, uquçılarnı, ğömümän, xalıqnı tuplaw, anıñ mänfäğätlären yaklaw, tuğan telgä omtılışın ğämälgä quyu öçen ictimaği oyışmalar bik küp eş başqara ala. Sişämbe könne Bötendönya tatar kongressında «Tatar teleneñ dusları» isemle yaña cämäğät oyışmasınıñ oyıştıru komitetı utırışı buldı. Kongress citäkçelärennän ğäyre bu ciılışta veteran uqıtuçı Zäkiä Gömärova, filologiä fännäre kandidatı Zäytünä İsxakova, aspirant Färit Gäräyev häm başqalar qatnaştı. Mäxällälärdä, räsmi oyışmalarda, şifaxanälärdä, elemtä büleklärendä tatar telendäge yazular citärlekme, tatar telen uqıtuğa närsä qomaçawlıy, latin älifbasın üzläştergändä uqıtuçılarnıñ metodik ostalığın niçek üsterergä, başqa millät wäkillären tatar telenä öyrätügä niçek yardäm itärgä? Yaña cämäğät oyışması menä şuşındıy mäs'älälär belän qızıqsınaçaq häm bu oyışmanıñ bülekläre här şähärdä yäki rayonnarda oyıştırılaçaq.