Accessibility links

Кайнар хәбәр

Respublika mäktäplären kompyuterlaştıru häm alarnı İnternetqa totaştıru niçek bara?


Respublika mäktäplären kompyuterlaştıru häm alarnı İnternetqa totaştıru niçek bara?

Ser tügel, kompyuterlar, yaña texnologiälär belän ğädättä kübräk yäşlär eş itä. Läkin yäşlärne niçek qızıqsındırırğa, alarğa şul uq komp'yuterlarda eşläü öçen niçek mömkinleklär tabırğa? Şuşı mäsälälärne çişü yözennän Tatarstan xökümäte respublika mäktäplären kompyuterlar belän täemin itü programmasın tözegän ide. Sişämbe könne könne ütkän jurnalistlar belän oçraşuda Tatarstan mäğärif ministrı Faris Xarisov şuşı programmanıñ şaqtıy uñışlı ğına tämamlanuı turında xäbär itte. Xäzerge köndä respublika mäktäplärendä 18 meñ kompyuter bar, awıl mäktäplären İnternetqa totaştıru öçen östämä räweştä 1100 modem satıp alınğan. Ministr süzlärenä qarağanda, barlıq diärlek texnika da uqu prosesında inde qullanıla da başlağan, çönki kompyuterlar urnaştırudan tış, alar öçen programma produksiäse dä alına ikän. Mäsälän, matematika, ximiä, ingliz tele, fizika häm başqa fännär buença elektron däresleklär satıp alınğan.

Läkin iñ möhim mäsälä -- mäktäplärne İnternetqa totaştıru -- älegä bik awır bara. Säbäbe -- mäğärif ölkäseneñ älegä monıñ öçen finansları citmi. Bügenge köndä İnternet barı tik respublikanıñ zur şähärlärendä häm qayber rayon üzäklärendä genä bar. Faris Xarisov oçraşu waqıtında tağın ber problema turında da äytep kitte. Ul da bulsa -- mäktäplärdä informatika uqıtuçılarınıñ citmäwe. Şuşı uñaydan mägärif ministrlığı tarafınnan uqıtuçılarnı yañadan äzerläü eşe alıp barıla ikän.

«Azatlıq» radiosı öçen Tatarstan xäbärläre belän Qazannan Gölnaz İlgizär
XS
SM
MD
LG