Accessibility links

11 sentäber faciğäsenä yartı yıl: Tatarstanda mönäsäbät


11 sentäber faciğäsenä yartı yıl: Tatarstanda mönäsäbät

Amerikadağı 11 sentäber faciğäsenä yartı yıl tuluğa qarata älläni köçle reaksiä buldı, dip äytep bulmıy. “Efir” telekompaniäseneñ Mäskäwdä ütkärelgän soraşu näticäläre belän kileşep bula. Soralğan xalıqnıñ yartısı amerikalılarğa elekkeçä bitaraf mönäsäbättä qala birä. Mäğlüm bulğança, Amerika faciğasınnan soñ “Amerika üzgärde, dönya üzgärde” didelär. Küptän tügel Tatarstan möselmannarınıñ ikençe qorıltayında möfti Rawil xäzrät Ğäynetdin “11 sentäber waqiğälärennän soñ dönya üzgärde disälär dä, bu döres tügel, säyäsätçelär üzgärde, säyäsät üzgärde” digän fiker äytkän ide. Berençe çiratta, dingä, İslamğa mönäsäbät turında äytelsä dä, bu fiker dönyawi tormışqa da turı kilä.

Äye, 11 sentäber waqiğälärennän soñ säyäsätçelär üzgärde, säyäsät üzgärde. Häm bu dönyalarnı da üzgärtep quydı. Torğınlıq yıllarında suğışlarnı baştan kiçergän olı buın keşeläre “tegese yuq, busı yuq, tegese citeşmi, monısı citeşmi” digännärgä “dönyalar ğına tınıç bulsın” dip östäp quya ide. Alar meñ qat xaqlı bulğan. Dönyalar xäzer tınıç tügel. Şuña kürä “tawıq botlarına qorıç çıbıqlar” çornap quyıla. Tatarstanda inde iqtisad, sotsiologiä belgeçläre tawıq ite bäyäseneñ 15-20 % artaçağın farazlıy. Çönki ni disäñ dä, respublikada citeşterelä torğan tawıq ite genä citmäyäçäk häm anıñ bäyäse Amerika tawıqlarınnan qibatraq bulaçaq. Ä xalıq telendä “ножки Буша” dip yörtelgän tawıq botları yarap quya ide äle. Bigräk tä pensionerlar 15-20 sumğa şul tawıq botın alıp qaytıp, aş peşersälär, köne buyı tamaqları tuq bula ide.
XS
SM
MD
LG