Axırda tağın ber möhim xäbär. Bigräk tä İnternet aşa «Dulqın» radiosın tıñlauçı çit ildäge millättälärebez öçen. Soñğı atnalarda 5 yıl buyı 105.3 FM dulqınında tatarça tapşırular alıp barğan «Dulqın» radiosınıñ yabılu mömkinlege turında mäğlümätlär kiñ taraldı. Tapşırular alıp baru öçen litsenziäne «Dulqın» kompaniäse 2 yıl elek alğan bulsa da, 1 millionnan artıq sum aqçanı bügenge köngä qädär tülämägän bulğan. Şul säbäple, «Dulqın» eşlägän yışlıqlar yañadan federal' litsenziä komissiäsenä konkursqa quyıldı. Çärşämbe könne şuşı komissiä aldında «Dulqın» eşlägän yışlıqqa däğwa itkän 7 kompaniä cıyıldı. Alar arasında «Dulqın» aksionerlıq cämğıäte dä bar ide. Ämmä, forsattan faydalanırğa mömkin çaqta tieşle çaralar kürmägän kompaniägä bu dulqınnı alu nasıyp bulmağan. Däğwa itüçelärneñ iñ köçleläre arasına «Dulqın» elägä almağan. Däğwaçılarnıñ kübese tapşırularnı rus telendä alıp barırğa cıyına ikän. Rusiä prezidentınıñ İdel buyı federal' okrugındağı wäkile Sergey Kirienko cibärgän komissiä äğzası Qazan efirına kerergä telägän başqa ber kompaniägä östenlek birüne täläp itkän. Läkin Tatarstan prezidentı häm Däwlät Şurası isemennän barğan komissiä äğzaları Zilä Wälieva häm Andrey Grigoryev ZAO «TVT» cämğıäteneñ iqtisadi häm icadi proektın yaqlağannar, alar tapşırular tatar häm rus tellärendä bulıp, moñarçı «Dulqın» radiosın tıñlarğa künekkän auditoriä mänfäğätlären känäğätländerüne täläp itkännär. Şulay itep, 27 martta Mäskäwdä ütkän federal' litsenziälärne birüçe komissiädä ZAO «TVT» kompaniäse ciñep çıqqan. Alar oyıştırğan radionıñ icadi programması nindi bulır häm «Dulqın» radiosı eşlägän 105.3 FM dulqınında nindi yañalıqlar kötelä — bu xaqta tizdän ZAO «TVT» kompaniäse Qazanğa qaytıp cämäğätçelekkä añlatır dip kötelä. Xäyer, inde xäzer ük «Dulqın» radiosında şaqtıy zur üzgäreşlär bulaçağında berkemneñ dä şige yuq.
«Azatlıq» radiosı öçen Tatarstan xäbärläre belän Qazannan Gölnaz İlgizär
«Azatlıq» radiosı öçen Tatarstan xäbärläre belän Qazannan Gölnaz İlgizär