Menä şundıy kierenke könnärdä respublikada tağın ber şaqqatırğıç xäbär taraldı. Uzğan şimbädä Mintimer Şäymiev Prezident apparatınıñ eşlär idaräçese Şamil Zarifovnıñ wazifaların buşatuı turında ğarizasın qabul itkän. “Вечерняя Казань” gazetası 2 april sanında “Şäymiev komandasında yomşaq buın” digän yazmasında bu wäzğiätkä analiz birä. Şamil Zarifovnıñ 1995-1997 yıllarda Çexiädä daimi wäkile bulıp eşläwen, yäğni berniqadär säyäsät belän şöğellänüen iskä alıp, bu waqiğanı säyäsät belän bäyle buluın işarä itä. Yäğni, Tatarstan citäkçelege aldında olı säyäsi bäreleşlär torğanda, Şäymiev üzen diskreditatsiäli alırlıq figuralardan waz kiçä. Läkin şul uq maqälädä bu otstavkanıñ asılında wazifaların başqaruda arttırıp cibärülär, xärämläşülär säbäp buluı turında yazıla. Çınnan da älegä Şamil Zarifovnıñ wazifalarınnan azat itelüe turındağı färmannı äle kürgän-belgän keşe yuq. Ğäyre räsmi çığanaqlardan belengänçä, bu otstavka şul xucalıq eşlärendä şuxır-muxır kiterülär, qoda-qodağıylıq, äşnälek ğälämätläre belän bäyle ikän.