Accessibility links

Кайнар хәбәр

Qazanğa Çeçen Respublikasınıñ delegatsiäse kilde


Qazanğa Çeçen Respublikasınıñ delegatsiäse kilde

Tatarstan Çeçnägä militsonerlar cibärep kenä qalmıy, ä başqa tör yardäm dä kürsätä. Qazanğa Çeçnäneñ Şelkovskoy rayonınnan delegatsiä kilde. Alar arasında rayon xaqimiäte wäkilläre häm küptän tügel genä şuşı rayonda açılğan Tatar milli-mädäni üzäge citäkçese Artur Nogmanov ta bar. Qunaqlarnıñ respublikağa kilüläreneñ maqsatları — şuşı könnärdä Çeçnägä kitüçe Tatarstan militsiä xezmätkärläre belän oçraşu, tatar mädäniäte, mäğärife belän tanışu. Sişämbe könne Çeçnädän kilgän delegatsiäne Däwlät Şurasınıñ Fän, mäğärif häm milli mäsälälär komissiäse räise Räzil Wäliev qabul itte. Oçraşu waqıtında qunaqlar Çeçnädäge, ayırım alğanda, Şelkovskoy rayonındağı xällär, xalıqnıñ tormışı, problemaları turında söyläde. Alarnıñ süzlärençä, bu rayonda 51 meñ keşe yäşi häm anda Çeçnäneñ başqa töbäkläre belän çağıştırğanda şaqtıy ğına tınıç ğömer itälär. Rayonda mäktäplär eşli, byudjet tarmağında eşläwçelär az ğına soñğa qalıp bulsa da xezmät xaqların alalar, pensiälär dä tülänä ikän. Şunısı qızıq, Şelkovskoy rayonındağı 4 noğay tatar awılları mäktäplärendä tatar telendä uqıtu da cayğa salınıp kilä. Qunaqlarnıñ Qazanğa kilü säbäpläreneñ berse — şuşı eşne caylaw da. Oçraşu barışında Qazanda çeçen uqıtuçıları öçen maxsus kurslar açu mömkinlege turında da süz buldı. Şulay uq, Çeçnädän kilgän qunaqlar Tatarstannan üzläre belän respublika Milli kitapxanäse tapşırğan küpsanlı kitaplar, däresleklär, metodik äsbaplar, Däwlät cır häm biyü ansamble tarafınnan büläk itelgän milli kiemnär dä alıp kitäçäklär.
XS
SM
MD
LG