Qazanlılar yaqınlaşıp kilüçe kürenekle şağir Ğabdulla Tuqaynıñ tuğan könen bilgeläp ütärgä äzerlänälär. 26 aprilgä qarağan bäyräm çaraların ütkärü respublikada inde matur ber traditsiägä äwerelde. Bıyıl alar tağı da kübräk häm qızıqlıraq bulırğa oxşağan. Bäyräm 26 aprildä Musa Cälil isemendäge opera häm balet teatrı yanındağı Tuqay häykäle aldında şiğır bäyräme belän başlanıp kitäçäk. Bu çarada yazuçılar, şağirlär, sänğät ostaları, şulay uq Ğabdulla Tuqay isemendäge premiäneñ yaña laureatları da çığış yasıyaçaq. Ä kiçen böek şağirneñ tuğan könen bäyräm itü Ğäliäskär Qamal teatrı yanında däwam itäçäk. Monda respublikanıñ tanılğan sänğät ostaları qatnaşlığında «Tuğan tel» isemle mädäni programma uzaçaq. Bu çara bıyıl äle berençe genä märtäbä utkärelsä dä, oyıştıruçılar anıñ uñışlı buluına ber dä şiklänmilär häm bu tamaşanı här yılnı ütkärergä niätlilär, dip xäbär itä İntertat säxifäse. Tuqay tuğan könendä Qazanda tağın ber kürkäm bäyräm çarası ütkäreler dip kötelä. 26 apirldä Tatarstan yazuçılar berlegeneñ Tuqay klubında näfis süz ostalarınıñ öçençe respublika bäygese ütäçäk. Anda Tatarstannıñ törle rayon-şähärlärennän kilgän wäkillär sänğätle söyläwdä üzläreneñ köçlären sınıyaçaq. Alarnıñ çığışların märtäbäle jüri bäyäliäçäk. Näni näfis süz ostaları arasında ciñüçelär ayırım bilgelänäçäk.
«Azatlıq» radiosı öçen Tatarstan xäbärläre belän Qazannan Gölnaz İlgizär
«Azatlıq» radiosı öçen Tatarstan xäbärläre belän Qazannan Gölnaz İlgizär