Accessibility links

Кайнар хәбәр

Tatarstan Konstitutsiäsenä üzgäreşlär häm östämälär kertü turındağı qanun 10 könnän ğämälgä kerä


Tatarstan Konstitutsiäsenä üzgäreşlär häm östämälär kertü turındağı qanun 10 könnän ğämälgä kerä

30 aprildä Tatarstan Respublikası Konstitutsiäsenä üzgäreşlär häm östämälär kertü turındağı qanun räsmi mäğlümat çaralarında bastırılıp çığarıldı. Dimäk, tağın 10 könnän ul üz köçenä keräçäk. 29 aprildä uzğan Däwlät Şurası utırışında inde 12. plenar sessiäne 29 mayğa çaqıru turında qarar qabul ittelär. Älege utırışta Tatarstan Konstitutsiäseneñ yaña redaksiäse turında süz küp buldı. Federal' Konstitutsiägä yaraqlaştıru öçen bik zur eşlär başqarılsa da häm asılda Tatarstannıñ yaña Konstitutsiäse buldırılsa da, äle federal' qanunnar belän qarşılıqlar qaldı. Däwlät Şurası räise Färit Möxämmätşin utırış barışında jurnalistlar belän äñgämälärendä qarşılıqlar qaluın tanıdı häm “bez moña belä torıp bardıq, çönki bezneñ suverenitet mäsäläsendä wäqälätlär büleşü turındağı şartnamädä bilgelängänçä, üz pozitsiäbez bar”, digän fiker äytte. Şartnamä Vladimir Putinnıñ yıllıq yullamasında äytelgänçä, legitim häm konstitutsion dip tanıldı. “Berniqadär waqıttan soñ bez üzebezneñ şartnamäne yañadan qarıyaçaqbız. Qayber normalarnı tormışçanlaştıru öçen täğäyenlärgä, konkretlaştırırğa kiräk”, dide Färit Möxämmätşin. Konstitutsiäseneñ yaña redaksiäsendä Tatarstan prezidentına kandidatnıñ ike däwlät telen dä belüe taläbe Mäskäwgä bik oşap betmi ikän äle. Rusiä prezidentı üzeneñ xezmätlärenä bu mäsäläne tağın ber tapqır tikşerep qararğa quşqan.

Xäyer, ikençe däwlät tele, tatar tele kiräkme-yuqmı, mäktäplärdä ul nindi külämdä uqıtılırğa tieş, digän bäxäslär Qazanda uzğan yıl uq başlandı. Qazan mäktäplärendä tatar tele uqıtu mäcbürilegen bäxäskä quyuçı yurist Sergey Xapugin ike rayon mäxkämäsendä süze ütmägäç, inde Rusiä Federatsiäseneñ Konstitutsion mäxkämäsenä şiqayät itte. Mäxkämälär bu eşlärne qarağanda, Tatarstan xalıqları telläre häm Mäğärif turındağı qanunnarğa tayanıp eş itkäç, xäzer Sergey Xapugin älege qanunnarnı Rusiä Konstitutsiäsenä qarşı kilä dip, şiqayät itkän.
XS
SM
MD
LG