Accessibility links

Кайнар хәбәр

Tatar ictimaği oyışmaları Qazanda sıra bäyrämen uzdıruğa qarşı çığa


Tatar ictimaği oyışmaları Qazanda sıra bäyrämen uzdıruğa qarşı çığa

Atna azağında başqalabız Qazanda tağın ber bäyräm, sıra bäyräme ütkäreläçäk. Mäğlüm ki, bu bäyräm uzğan yıl zurlap Qazan Kremle yanındağı häm Üzäk stadion qarşındağı mäydanda, Yärminkä mäydanında ütkärelde. Ber kön barğan bäyrämne yıl buyı tänqitlädelär, bigräk tä tatar ictimaği oyışmaları bäyrämneñ ütkärü räweşe belän kileşmädelär. Yıl däwamında piketlarda sıra bäyrämenä qarşılıq aksiäläre ütkärelde häm küptän tügel bıyıl sıra bäyräme ütkärelmi ikän, digän farazlar işetelde. Ber-ike atna elek bu faraz raslandı da kebek ide. Xökümät qarşında oyıştırılğan narkotiklarğa qarşı komissiä utırışında komissiägä kergän ictimaği oyışmalar häm yäşlär tärbiäse belän şöğellänüçe qayber ministrlıqlar sıra bäyräme ütkärügä qarşı möräcäğät qabul ittelär. Läkin uzğan atna azanğında “Qızıl şärıq” şirkäte general direktorı Ayrat Xäyrullin ütkärgän matbuğat oçraşuında sıra bäyräme 25 mayda ütkäreläçäge iğlan itelde. Döres, ul xäzer sıra bäyräme dip tügel, ä “Qızıl şärıq” aksionerlıq cämğıäte köne dip atalaçaq. Häm anda matbuğatta tänqitlängän äxlaqsız “Miss popka” digän şärä qızlar bäygeläre ütkärelmyäçäk inde. Bäyräm ütkärügä “Qızıl şärıq” şirkäteneñ däğwası zur. Uzğan yıl respublika byudjetına älege şirkät 800 million sum salım tülägän. Bıyıl bu san ikelätä artaçaq. Şuşı aqça dälile belän Qazan administratsiäse dä, xätta iñ yuğarı xakimiät tä kileşä, küräseñ.

Küptän tügel Qazan administratsiäse mäktäplärdä Soñğı qıñğıraw bäyrämeneñ 1 kön aldan, 24 may könne ütkäreläçägen iğlan itte. Döres, räsmi räweştä säbäpläre balalarnıñ äti-änilären 25 may yal köne mäşäqätlärennän ayırmasqa, dip belderelde. Läkin mäğlümat çaraları monıñ 25 may “Qızıl şärıq” sıra şirkäte könen uzdıruğa tağın da kübräk yäşlär cälep itü öçen qılınğan ğamäl ikänen açıq itep yazıp çıqtılar. Ä inde iñ yuğarı dairälärgä kilgändä, Mintimer Şäymievneñ iqtisadi kiñäşmälärdä “Qızıl şärıq” şirkäten byudjetqa kertkän öleşe öçen zurlap maqtağanı bar. Monnan berniçä kön elek prezidentınıñ säyäsi mäsälälär buyınça kiñäşçese Rafail Xäkimov “Efir” telekompaniäsenä birgän intervyusında sıra bäyräme ütkärüne xuplawın, yäşlärdä eçü kulturası tärbiälärgä kiräk, digän fiker äytte. Ay-hay, Almaniädäge kebek restoran şartlarında ütkärelä torğan sıra bäyrämnäre däräcäsenä kütärelü Möxämmät Mähdiev äytmeşli, “едва ли...”. Uzğan yıl kebek ük mäydanğa sıra larekları häm militsiä belän qamatıp alınğan meñärlägän yäşlär aldına berdän-ber säxnä quyıp, anda şärä qızlar bietü genä eçü kulturasın arttırır mikän?

Yunıs Ätnäle
XS
SM
MD
LG