Accessibility links

Кайнар хәбәр

Tatarstan prezidentı süzçesez qaldı


Tatarstan prezidentı süzçesez qaldı

Çärşämbe könne bezgä respublikanıñ eçke tormışına qağılışlı tağın ber qızıqlı xäbär kilep ireşte. Tatarstan teleradiokompaniäseneñ räise itep İrek Mortazin bilgelänä ikän. «Вечерняя Казань» gazetası xättä anıñ räseme belän reportaj birep, prezidentnıñ yaña süzçese itep kemnär bilgelänäçäge turında farazlar da tarattı. Ber-işe xäbärlärgä qarağanda bu urınğa jurnalistlar berlege räise Rimma Ratnikova bilgelänä, imeş. Çärşämbe könne töştän soñ bu xäbär Qazannan Pragaga cibärelgändä, İrek Mortazinnıñ teleradiokompaniä räise itep bilgelänüe turında ukaz imzalanuı da mäğlüm buldı. Läkin anı kollektivqa täqdim itü, jurnalistlar belän räsmi oçraşu kötelügä dä qaramastan bu könne bulmadı. Qayber dairälärdä İrek Mortazinnı azat itü belän beryulı anıñ urınına kemne bilgeläw turında da qarar qabul itelergä tieş, dip sanıylar. Xäyer, Tatarstan teleradiokompaniäseneñ yaña citäkçesenä aşığırğa da kiräkmäs. Çönki bu kompaniä äle yaña sıyfatta oyışıp citmägän. Ul elekkege Tatarstan teleradiokompaniäsennän «Yaña ğasır» digän möstäqil kompaniä ayırılıp çıqqannan soñ, Rusiäneñ VGTRK digän üzäk kompaniäseneñ Tatarstan buyınça cirle oyışması bularaq tözelergä tieş. «Yaña ğasır» kompaniäsen elekke däwlät kompaniäseneñ räise İlşat Äminev citäkli. Ä Rusiä qaramağına tulısınça küçkän Tatarstan kompaniäseneñ küpme cixazı barlığı, anda küpme keşe eşläwe xäzergä bilgele tügel. İrek Mortazin yaña komanda cıyıp yäki iske kadrlarnı qullanıp ör-yaña televidenie törkeme oyıştırırğa tieş. Moña kädär premyer-ministr urınbasarı Zilä Wälieva citäkçelegendä elekke Tatarstan kompaniäsen bülü buyınça tözelgän komissiä Mäskäw wäkilläre belän söyläşülär ütkärep, bülenü eşen tämamlarğa tieş. İrtäme-soñmı bu eşlär tämamlanır. Tatarstannıñ täwlek buyı eşli torğan «Yaña ğasır» digän telekompaniäse sputnik aşa eşläp kitär. Rusiä televideniäseneñ respublikadağı bülekçäse dä üz yözen tabır dip ömetlänergä kiräk. Tatarstan radiosınıñ kollektivı da, efirğa çığu çeltäre dä üzgäräçäk, älbättä. Dimäk, «Azatlıq» radiosınıñ ozın dulqınnar aşa yäki FM kanalı buyınça retranslyatsiäläw mäs'äläse yaqın ayda maxsus qaralırğa tieş. Tatarstan radiosı citäkçese Miläwşä Aytuğanova älege oyıştıru mäs’äläläre tämamlanğançı bernindi dä näticä yasamaw yağında. Yaqın arada barısı da açıqlanır, dip sanıy ul. Tatarstan citäkçeläre häm Rusiäneñ räsmi televidenie kanalı efirnı häm teleradiokompaniälärne büleşü turında üzara kompromissqa kilergä tieş. Ä xäzergä «Yaña ğasır» kompaniäseneñ başında İlşat Äminev qalıp, Mäskäw qaramağındağı kompaniägä prezidentnıñ süzçese İrek Mortazinnıñ bilgelänüe turında ğına äytä alabız.
XS
SM
MD
LG