Qazan kremle qarşında Efir telekompaniäseneñ bäyräme uzdı

Qazannıñ ağımdağı tormışına kilgändä, xucalıq, kommunal' mäsälälär haman iğtibar üzägendä qala. Säyäsät belän xucalıqnı bergä butau küreneşläre dä bar. 25 mayda, Sıra bäyräme kiçekterelgännän soñ, şuşı säüdä reklama aksiäseneñ säyäsi mäğnäse dä kürelde. “Qızıl Şäreq” kompaniäseneñ citäkçese Ayrat Xäyrullin Qazan kremle yanında sıra tuyı ütkärüneñ kiçekterelüenä bik räncegän ikän. Anı däülät televideniäseneñ “İtogi nedeli” tapşıruına çaqırıp, Leonid Tolçinskiy “Qızıl Şäreq”nıñ qazanışların häm produksiäsen tamaşaçılarğa kürsätergä mömkinlek birde. Televizor qarauçılarnıñ soraularına turıdan-turı cawap birgändä maqtau da, xurlau da küzgä taşlandı. Şunda uq, 7 yündä Yärminkä mäydanında ütkän “Efir” telekanalınıñ bäyrämennnän reportaj kürsätelde. Yäşlär eçep tilelänä, Kreml' divarları yanında bädräf citmäü säbäple quaq töplären yüeşlätä, säxnädä “Ay-da pivo, ay-da “Krasnıy Vostok”, digän tawış qabatlana. Baqsañ, “Efir”nıñ bäyräme – şul uq sıra firmasın reklamalauğa qaytıp qalğan ikän. Şul uq Mäskäü estradası yoldızları, şul uq sıra reklaması, şul uq urın. Dimäk, ike atna eçendä beryulı ike sıra bäyräme bulası bulğan. 25 mayda “Qızıl Şäreq”nıqı, 7 yündä – “Efir”nıqı. Säxnädä ber ük waqiğalar, küktä ber ük feyerverk, qolaqlarda ber ük firmanıñ sırasın maqtau. Bolay xalıq sıranıñ araqıdan yomşağraq ikänen belä häm aña qarşı tügel. Ämmä, uzğan yılda Qol Şärif mäçete qarşında säxnä qorıp, şul säxnägä şäp-şärä qızlar bastırıp, alarnıñ art sannarın, kükräklären çağıştıru ayığraq keşelärneñ isendä qalğan ide. Şuña kürä, bu tamaşanıñ urının yäki waqıtın üzgärtüne cämäğätçelek täläp itkän ide. “Qızıl şäreq” xucaları häm şähär türäläre äle dä menä şuşı ğadi genä argumentnı añlamağannar, axırı.