Tatarstan Prezidentınıñ yaña süzçese.

Başqortostanlılarnıñ olı qayğısı Tatarstanğa da zur tä'sir yasadı. Häläkät turındağı mäğlümat, böten yañalıqlar tapşırularında berençe xäbär bulıp bardı. Tatarstan Prezidentınıñ matbuğat üzäge sişämbe kiçendä, Mintimer Şäymievneñ qayğınamäsen tarattı. Anda bolay dip äytelä : «Xörmätle Mortaza Ğobaydulla ulı! Tatarstannıñ küp millätle xalqı häm şäxsän üzemnän balaların, tuğannarın yuğaltqan qärdäşlärebez, Başqortostanlılarnıñ tirän qayğısın urtaqlaşam». Ämma tormış däwam itä. Çärşämbedä kön tärtibenä başqa temalar kilep kerde. Äle kiçä genä, qayğınamä tekstın tözegän Tatarstan Prezidentı apparatı bügen inde yaña citäkçe kilü mäs’äläsen tikşerä. «Вечерняя Казань» gäzite häm qayber internet säxifäläre taratqan xäbärlärgä qarağanda, Mintimer Şäymievneñ yaña süzçese itep Ayrat Zaripov bilgelänergä mömkin. Moña qädär ul şähär xakimiäteneñ cämäğätçelek belän eşläw idaräsen citäkläde. Prezident bu qararğa äle qul quymasa da, Ayrat Zaripovnı yaña wazıyfağa bilgelänüe belän tanışları häm dus-işläre inde qotlıy başladı.