Tatarstanda Qıtay delegatsiäse

Tatarstanda bu könnärdä Qıtaydan kilgän qunaqlarnı xörmätlilär. İnde xäbär itkänebezçä, Qazanğa räsmi vizit belän Qıtay xalıq respublikası delegatsiäse kilde. Anı Qıtaynıñ Däwlät Şurası premyerı urınbasarı Li Lan'sin citäkli. Qunaqlar arasında, şulay uq, Qıtay respublikasınıñ mäğärif ministrı, Qıtaynıñ Rusiädäge ilçese, finans ministrı urınbasarı häm başqa xökümät wäkilläre bar ide. Sişämbe könne Qıtay delegatsiäse Tatarstan prezidentı Miñtimer Şäymiev belän oçraştı. Oçraşu waqıtında süz üzara xezmättäşlek, säwdä bäyläneşläre turında bardı. Äytergä kiräk, Tatarstannıñ Qıtay respublikası belän nıqlı säwdä mönäsäbätläre bar. Soñğı yılda ğına alar arasındağı säwdä äyläneşe 2 märtäbägä diärlek artqan. Respublika qıtaylılarğa yök maşinaları, başqa texnika, nefteximiä produksiäsen sata. Miñtimer Şäymievneñ oçraşudan soñ äytelgän süzlärenä qarağanda, Tatarstan Qıtay respublikasınıñ ayırım provinsiäläre belän tağın da tığızraq mönäsäbätlär urnaştırırğa uylıy ikän. Annan tış, respublikada Qıtay meditsinasın üsterü turında da söyläşenelgän ikän. Şulay uq qıtaylılarnı Tatarstan belän nığraq tanıştıru öçen respublika turında film da töşereläçäk. Qıtaylılar üz çiratında Tatarstan televideniäse aşa üzläre belän tanıştıraçaq. Qıtaylılarğa isä Tatarstanda bik oşağan. Delegatsiäne citäkläwçe Li Lan'sin, bez respublika turında bik küp yaxşı mäğlümätkä iyä idek. Läkin Tatarstan bez uylağannan da kürkämräk bulıp çıqtı, dide. Tatarstan citäkçelege belän oçraşudan soñ ul da, bez respublika belän barlıq ölkälärdä dä xezmättäşlek itärgä äzer, dip belderde. Şulay itep, Tatarstannıñ Qıtay belän duslığı tağı da nığırğa tieş. Çärşämbe könne Qıtay respublikası wäkilläre Mäskäwgä yul tottı. Anda alar mäğärif, mädäniät, sälämätlek saqlaw häm sport ölkäsendä xezmättäşlek buyınça Rusiä-Qıtay komissiäseneñ utırışında qatnaşaçaqlar.