Accessibility links

Кайнар хәбәр

“Berdäm Rossiä” räsmiläreneñ Qazanğa kilüwe artında ni tora?


“Berdäm Rossiä” räsmiläreneñ Qazanğa kilüwe artında ni tora?

Qazanda ikençe kön “Berdäm Rossiä” firqäse citäkçelege häm Däwlät duması deputataları qunaq bulıp yöri. Xäyer, räsmi xäbärlärgä qarağanda, “Berdäm Rossiä”neñ general' şura räise Aleksandr Bespalov citäklägän delegatsiä biregä qunaq räweşendä tügel, partiä eşlären canlandırırğa kilgän. Bügen Qazanda Mäskäw wäkilläre üzläreneñ cirle bülekçäse aktivistları belän kiñäş tottı. “Berdäm Rossiä” citäkçelären pänceşämbedä älege firqäneñ räistäşe Mintimer Şäymiev üze qabul itte. Şul uq kiçne Aleksandr Bespalov “Tatarstan” Däwlät televideniese aşa tamaşaçılarnıñ sorawlarına cawap birde.

Oşbu partiäneñ zur tizlek belän äğzalar cıyuın, anıñ töbäklärdä tiz arada agitmassa eşen kiñ cäyelderüen kürep, ireksezdän elekkege KPSS çalımnarın iskä töşeräseñ. “Berdäm Rossiä” KPSS kebek ük türälär firqäse häm bügenge vlast'qa teräk, yaqlap toruçı säyäsi oyışma. Ä küpsanlı ğadi äğzalar partiäne xalıq mänfäğätlären yaqlawçı köç dip iğlan itärgä mömkinlek birä. Xalıq mänfäğätlären yaqlaw yulında partiä liderları qayçaq parodoks taşlarına abına. Soñğı aylarda, “Berdäm Rossiä”, mäsälän, keşelärgä xezmät xaqın waqıtında tüläw öçen köräşä, törle aksiälär uzdıra. “Tuqtağız äle!- diäse kilä,- Ä kem soñ, qaysı xökümät räxmätkä eşlätüne ğamälgä kertte dä, mondıy wäzğıätne tudırdı? Şul uq “Berdäm Rossiä” yaqlap kilgän vlaç tügelme?

“Tatarstan” telekanalınnan çığış yasağanda Aleksandr Bespalov xalıqqa yararğa tırışıpmı, populistik täqdimnär dä äytte. Misal öçen, fatirğa tülämäskä dä bula ikän, çönki alarnıñ bähäsen sovet çorında az aqça alıp, xökümätkä bil bögep eşlägän keşelär, möğayın, isäp-xisapnı qaplagan inde. Monı sanap qararğa kiräk: kemneñ kemgä äcäte bar. Bespalov fikerençä, keşelär xökümätkä tügel, xökümät bezgä burıçlı. Niçek inde mondıy qıyu lidernı xörmät itmiseñ?!

Tatarstan liderı da partiäneñ xalıq aldında yözen buldıru zarurlığın tikmägä genä iskä almağandır. Mintimer Şäymiev isä monı populistik şiğärlärdä tügel, konkret ğämäldä kürä. Monda tabiği monopoliälärgä mönäsäbät, energetiqa sistemasın reformalaw, xalıqnı cir reformasına yaqınaytu, üzäk belän töbäklär arasında xaqimiät wäqälätläre çiklären bilgeläw h.b. iskä alındı.

Aleksandr Bespalov komandasına iärep kilgän töbäklär fraksiäse citäkçese Oleg Morozov üzäk häm regionnar wäqäläte xaqında maxsus kileşülär tözärgä kiräkmi, alar Konstitutsiägä salınırğa tieş dip, belderde. Ä beznekelär isä, Mäskäw belän bu xaqta maxsus kileşü yasarğa niätläp yörilär. Qızğanıç, Tatarstannan saylanğan Däwlät Duması deputatınıñ fikere qapma-qarşı.

Älbättä “Berdäm Rossiä”neñ canlanuı alda torğan Duma saylawlarına ğına bäyle tügel. Töp maqsat Rossiä prezidentın saylawlarğa äzerlek. Biredä töbäklärneñ häm alarnıñ liderlarınıñ role bik zur. Ber yodrıqqa tuplanıp, berdäm komanda bulıp Vladimir Putinnı ikençe tapqır prezident itep saylaw öçen böten mömkinleklär faydalanırğa tieş. Läkin ğadi xalıqnıñ säyäsi firqalärgä bulğan simpatiäse älegä bik zur tügel. Bu cähättän Rossiä Tormış partiäse räistäşe, Tatastannıñ Rossiä federal' cıyılışındağı wäkile Räfğat Altıynbaev fikere qızıqlı. Anıñ süzlärenä qarağanda, ildä yäşäwçe xalıqnıñ 85 protsentı bernindi partiägä dä kermi häm xätta qaysınıñ da bulsa taraftarı da bulıp tormıy. Xaqimiätkä kilü öçen genä bilgelängän maqsat – maqsat tügel. Altınbayıvnıñ säyäsi mäsälälärdä yaxşı yözä belüen iskä alsaq, ul xaqlıqtan yıraq tügel diärgä bula. Anıñ bu xaqta “Tatar-inform”ğa birgän mäğlümätläre ber yaqtan qızıqlı, läkin ikençe yaqtan soraw da tudıra. Nişläp, Tatarstan wäkile “Berdäm Rossiä” saflarında tügel, ä Rossiä Tormış partiäsendä? Ällä Räfğat Altıynbaev tağın başqa arbağa utırıp üz yulın ezlime?

Älege temanı yomğaqlap, şunı äytäse kilä: hawada politqarlığaçlar oça başladı. Dimäk, tizdän saylawlar. Saylawçılar qolaqlarığıznı tırpaytığız. Läkşäne qayadır elärgä kiräk bit.
XS
SM
MD
LG