Ekstremistlıqqa ike qaraş

Ğosman xäzrät İsxaqıy, şulay uq, desantçılar könen bäyräm itkändä äzerbäycannarğa qarata ekstremist xäräkätlärne xökem itte. Eş şunda ki, 2 avgust, desantçılar könenendä ğädättägeçä, Qazannıñ üzäk uramnarında törle yıllarda desant ğäskärlärendä xezmät itkän irlär cıyılıp bäyräm itte. Ğädättägeçä, mondıy bäyrämnär, araqısız uzmıy. «Efir» telekompaniäse kiçke xäbärlärendä, bäyräm itüçe iserek desantçılar Qazannıñ Üzäk bazarında pogrom oyıştırdı, cärähätlänüçelär, xätta ber häläk buluçı da bar, dip xäbär itelde. Ä menä Däwlät Tele-radiokompaniäse xäbärlärendä bu xällär inqär itelde. İkençe könne, eçke eşlär ministrlığınıñ räsmi zatları älege pogrom turında, bigräk tä anıñ näticälären -yaralanuçılar, ülüçelär turında xäbärne, qatğıy räweştä inqär itte. Läkin cil ismiçä, yafraq selkenmi dilär. Xalıq arasında desantçılar bäyräme könne Kolxoz bazarınıñ irtä yabıluı, ä kem äytmeşli, «litsa kavkazskoy natsionalnosti» yäğni Könyaq Kavkaz yaqlarınnan kilep, satu itüçe xalıqlarnıñ bötenläy kürenmäwe turında süzlär yörde. Çönki desantçılar könendä, yarım xärbi kiemdäge, qızmaça yegetlärneñ, Üzäk Kolxoz bazarında satuçılarnı pıran-zaran kiterep, qıynap çığaruları inde soñğı 4-5 yılda ğädätkä kerep bara ikän. Ğädättä, militsiä xezmätkärläre, mondıy ğämälne tıymıy, qatnaşmıy dilär. Yuğisä, äle küptän tügel genä, Rusiädä ekstremizmğa qarşı qanun qabul itelde. Küräseñ, Rusiä xoquq saqlaw orğannarında ekstremizm ike sortka bülenä. Ägärdä ul milli mäsälälärne, möselman qanunnarın yaqlap qılınğan gämäl bulsa, monısı -- bik xätär ekstremizm. Ägärdä, elekkege desantçılar, yä bulmasa, xäzerge skinxedlar başqa millät wäkillären cäberläsä, monısı inde -- bula torğan xäl. Küptän tügel, Qazanda, Vaxitov rayonı mäxqämäsendä ber törkem möselman xatın-qızlarnıñ Rusiä pasportlarına yawlıq börkänep — xidcapta fotoğa töşüne tıyuına qarata şikäyätläre kire qağıldı. Mäskäwneñ «Известия» kebek, üzäk gäzitläre, Tatarstan möselmannarınıñ şuşı ğädäti, qanunıy taläben ekstremizm dip bäyäläp, şarran suqtı. Ägärdä, älege xatın-qızlar, Tatarstan möselman xatın-qızları berlege oyışması yärdämendä, xalıqara mäxqämägä barıp citsälär, nişlärlär, Alla üze belä.