Accessibility links

Кайнар хәбәр

Gorbunov isemendäge aviatözeleş berläşmäsenä 75 yıl


Gorbunov isemendäge aviatözeleş berläşmäsenä 75 yıl

15 avgust, pänceşämbe könen Tatarstanda, bigräk tä başqalabız Qazanda, aviatsiä köne dip tä atarğa bula. Döresräge, aviatözeleş xezmätkärläre köne. Gorbunov isemendäge Qazan aviatözeleş berläşmäse 75 yıllığın bäyräm itä. Yubiley xörmätenä Ğaliäskär Kamal teatrı binasında tantanalı cıyılış ütkärelde. Anda premyer-ministr Röstäm Miñnexanov qatnaştı.

Ä ber kön aldan “Qazan yärminkäse” kürgäzmäsendä “Aviakosmik texnologiälär häm cihazlar: Qazan 2002” dip atalğan maxsus kürgäzmä eşli başladı. Älege kürgäzmädä 70 yaqın Rusiä häm Ukraina şirkätläre qatnaşa. Mondıy kürgäzmä Qazan tarixında täwge tapqır ütkärelä. Bu älege da bayağı Gorbunov berläşmäseneñ 75 yıllıq yubiley xörmätenä. Qazanda citeşterelä torğan TU-214 Aqtay, Ansat boralaqları uq quyılmasa da, älege kürgäzmädä motorlar tözü berläşmäsendä citeşterelä torğan oçqıç motorların kürergä bula. Kürgäzmäne qarağan waqıtında premyer-ministr Röstäm Miñnexanov Qazan aviatözüçelären därtländerep, kiläçäktä barlıq Rusiä aviatsiäse TU markalı oçqıçlardan ğına toraçaq, digän süzlär äytte.

Äye, bu Tatarstan aviatözüçelärneñ bik zur ömete, ışanıçı. Ägärdä Qazanda citeşterelä torğan TU oçqıçlarına häm MI boralaqlarına däwlät zakazları bulsa, äytkändäy, yartı Qazan xalqınıñ tamağı tuq, öste böten bulır ide. Älegä TU-214 oçqıçları lizing buyınça ğına urnaştırıla. Mäğlüm bulğança, ike oçqıç “Дальавиа”ğa birelde, häm menä Gorbunov berläşmäseneñ 75 yıllıq yubiley könendä tağın ber TU-214 oçqıçı Rusiä däwlät transport kompaniäsenä tapşırıla, dip xäbär itelde. Bu oçqıç Rusiä prezidentı oçqıçları otryadına tapşırıla. Ul maxsus yasalğan oçqıç. Älege transport kompaniäseneñ tağın öç TU-214 oçqıçına zakazı bar ikän. 2007 yılğa xätle lizing buyınça tağın un Tatarstan oçqıçı ozatılırğa tieş, dip belderä premyer-ministr Röstäm Miñnexanov.
XS
SM
MD
LG