Accessibility links

Кайнар хәбәр

Qazan aviatorları 75 yıllıq yubileen bilgeläde


Qazan aviatorları 75 yıllıq yubileen bilgeläde

Pänceşämbedä Qazan aviatorlarnıñ kükkä çöep maqtadılar. Eş şunda ki, Gorbunov isemendäge aviatsiä berläşmäse üzeneñ 75 yıllıq yubileen bilgeläp ütte. Kamal teatrı binasında uzğan oşbu çarada premyer-ministr Röstäm Miñnexanov Respublika prezidentı Mintimer Şäymiev qotlawın iğlan itte. Küpsanlı maqtaw süzläreneñ töp mäğnäse – aviatsiä berläşmäse ayaqqa basıp kilä torğan ömetle şirkät häm bez anıñ belän ğorurlanabız. Bu çınnan da şulaydır. Läkin biredä yaqın tarixqa küz salu da ğibrätle ğamäl. Äle berniçä yıl elek kenä küpmeñle kollektiv eşsez, aqçasız utıra ide. SSSR tarqalıp, iqtisadi bäyläneşlär özelgäç, aviatorlar eşsez qaldı. Rusiä un yılğa yaqın hawada remontlangan oçqıçlarda oçtı. Ägär dä şul wayımsız säyäsätne respublika da alıp barğan bulsa, aviatsiä berläşmäse älege yubileena, bälkem, cıyıla da almas ide.

Niçek kenä awır bulmasın, Tatarstan oşbu şirkätne saqlap qaldı. Häm menä, nihayät, awiatözüçelärneñ Mäskäw öçen dä kiräge çıqtı. Ber genä misal. Bu könnärdä Rusiä prezidentı apparatınıñ eşlär idaräsendä TU-214 oçqıçınıñ öçençesen satıp alu turında aktka qul quyıldı. Tizdän prezident Vladimir Putin dönya buylap Qazanda yasalğan oçqıçta säyäxät itäçäk. Bälkem, yaqın arada Rusiä prezidentı şul oçqıçqa utırıp, Qazanğa da kiler. Kongressqa bulmasa da, respublika könenä. Härxäldä, citäkçe dairälärdä moña bik ömetlänälär.
XS
SM
MD
LG