Accessibility links

Кайнар хәбәр

Vladimir Putin: "Här bala tuğan telendä belem alırğa xoquqlı"


Vladimir Putin: "Här bala tuğan telendä belem alırğa xoquqlı"

Kongress 29 avgustta eşläsä, ikençe könne tağın ber oçraşu buldı. 2 säğät däwam itkän oçraşuda Rusiä prezidentı Vladimir Putin tatarlar belän söyläşte. Şuşı oçraşunıñ häm, ğomümän, Tatar kongressınıñ iñ möhim waqiğälärneñ berse -- Bäläbäy tatar gimnaziäse direktorı Nurmöxämmät Xösäyenovnıñ Başqortostan tataralrı turında çığışı buldı. Bu çığış -- tirän mäğnäle häm qatlawlı. Nurmöxämmätneñ Başqortostanda tatar bulu ciñel tügel digän süzläre başta Vladimir Putin, annarı başqa säyäsätçelär tarafınnan küp tapqır täqrarlandı. Başqortostanda balalarğa iñ başta tuğan teldä belem birü urınına, başqa teldä uqıtırğa tırışu xaqında Rusiä prezidentı bolay dide:

Kemder, qaydadır balalarğa tuğan telne öyränergä röxsät itmi ikän -- bu inde yünsezlek. Rusiä küpmillätle il. Bezdä här millät wäkile üzen irken xis itep, här millät balası üz tuğan telendä belem alırğa xoquqlı.

Dimäk, tatar balaları tatarça uqırğa xaqlı, teläsä nindi millät wäkile qayda yäşäwenä qaramastan tigez xoquqlar belän qullanırğa tieş. Mondıy tigezlek tatarlarğa ğına tügel, barlıq millätlärgä dä kiräk. Tatar -- tatar bulıp, başqort -- başqort, çuaş -- çuaş bulıp yäşärgä tieş. Menä şuşı tabiği xoquqnı tergezergä Tatar kongressı yärdäm itte. Rusiädä millätlärgä qarata başbaştaqlıq kürsätergä totınğan qayber dairälär bu xäldän ğibrät alırğa tieşlär. Çönki Vladimir Putin qapma-qarşı şiğarlär yañğırata torğan säyäsätçe bulsa da, tatarlarnıñ taläbenä häm telägenä qarşı barırğa cıyınmıy. Ä qalğanı här millätneñ üzennän tora. Här millät üze ürçi, üz telen üze öyränä, üz cırların üze cırlıy.

«Azatlıq» radiosı öçen Qazannan Rimzil Wäli
XS
SM
MD
LG