Accessibility links

Кайнар хәбәр

BTİÜdä Başqortostan tatarları cıyılışında xalıq sanın aluda başqortlaştıru problemasına mönäsäbät belderelde


BTİÜdä Başqortostan tatarları cıyılışında xalıq sanın aluda başqortlaştıru problemasına mönäsäbät belderelde

25 sentäber könne BTİÜdä ütkän Başqortostan tatarları cıyılışı turında da Tatar-inform agentlığı bik saran ğına mäğlümat birde. Anda bolay dielä. “Cıyılışta Başqortostanda tatarlarnı «başqortlaştıru» säyäsäte turında fiker alışındı. Qatnaşuçılar fikerençä, Bötenrusiä xalıq sanın alu aldınnan basım köçäyde, bu tatarlarnı üzlären başqort itep kürsätergä öndäwdä çağıla. Moña qarşı kilüçelärgä eştän çığaru belän yanıylar. Tatar zıyalıları öçen Başqorotstan ğämmäwi mäğlümat çaralarına yul yabıq. BTİÜneñ ideologiä bülege citäkçese, «İdel–Ural» xäräkäte räise Ğayal Mortazin xäbär itüençä, Başqortostanda tatar telendä belem alırğa häm tatar sänğat törkemnäre eşçänlegenä çikläwlär oçrıy” dielä räsmi xäbärdä. 2,5 säğät barğan bu cıyılışta törle fikerlär, törle qaraşlar belderelde. Şularnıñ östen çıqqannarı şundıy. Başqortostandağı älege başqortlaştıru säyäsäte sovetlar çorınnan uq kilä. Häm ul şul qädär tiränläşkän ki, xäzer inde närsä dä eşlärgä, nindider çaralar kürergä soñ. Başqortostan tatarları cıyılışında yañğırağan tağın ber fiker. Aldağı xalıq sanın isäpkä aluda tatarlar da, başqortlar da ottıraçaq. Kem otaçağı, kem östen çığaçağı – barıbızğa da mäğlüm. Monıñ xaqında 1.5 ay şuşı xalıq sanın alu kampaniäsenä äzerlek çaralarında qatnaşqan Yaña-Savin rayonında wäkälätle wäkil bulıp eşlägän Zarema Xuciäxmätova söyläde. Eş şunda ki, xalıq sanın aludağı anketalar şul qädär butalçıq häm xäyläle ki, sorawlarğa niçek kenä cawap birsäñ dä, tegeläygä dä bolayğa da borıp bula. Zarema xanım şunı añlap, östäge çinovniklarğa şundıy kiräkmägän sorawlar quya başlağaç, anı bu wazifadan azat itkännär. Anıñ şuşı qatlawlı, xäyläle sorawlarnı analizlap yazğan mäqäläse “Watanım Tatarstan” gazetasınıñ 14 sentäbr sanında “Tuğan telebez - inoy yazıq” digän baş astında çıqqan bulğan. Xäyer, älege cıyılışta qatnaşuçılar aldağı xalıq sanın alu kampaniäseneñ säyäsäten, närsä kiterep çığarğanın yaxşı añlıylar. Şuña kürä cıyılışta baykot iğlan itü täqdime dä yañğıradı. Läkin mondıy çaranıñ da waqıtı uzğanı tanıldı. Şuña kürä cıyılışta qatnaşuçılar älegä quldan kilgänne barısın da eşlärgä, Başqortostan xalqına tağın ber qabat möräcäğät belän çığarğa, ä Qazanda qarşılıq aksiäläre, piketlar uzdırırğa täqdim ittelär. Cıyılışta Aydar Xälimneñ äle genä näşriättän çıqqan “Yaña sağış kitabı, yäki Minzälä Gaagadan yıraqmı?” digän kitabı da taratıldı. Ul bitkä-bit ike däwlät telendä dä - tatarça da, rusça da ber kitap itep töplängän.
XS
SM
MD
LG