Accessibility links

Кайнар хәбәр

“Tatar xalqı 1552 yıldan soñ: yuğaltular häm tabışlar”


“Tatar xalqı 1552 yıldan soñ: yuğaltular häm tabışlar”

Comğa könne irtän “Qazan” milli-mädäni üzägendä tağın ber kürkäm cıyılış uzdı. Ul “Tatar xalqı 1552 yıldan soñ: yuğaltular häm tabışlar” dip atalğan fänni-gämäli konferensiä ide. Monda da millätneñ qaymağı cıyılğan ide. Bötendönya tatar kongressı häm Tatarstannıñ fännär akademiäse uzdırğan bu çarada kürenekle zıyalılarıbız qatnaştı.

Älege konferensiäneñ räsmi dokumentlarınnan kürengänçä, çığış yasawçılar aqnı qara häm qaranı aq dip tormıyça, däwlätçelegebezne yuğaltuın, küp ğasırlar däwerendä däwam itkän imperiäçel säyäsätneñ tatar xalqınıñ tarixına tiskäre yoğıntısı buluı turında söylädelär. Biredä şulay uq Rusiäneñ başqa töbäklärendä yäşäwçe qan-qardäşlärebezneñ ruxi häm mädäni ixtıaclarınıñ citärlek qayğırtılmawı, islam faktorın ütä säyäsiläşterü xaqında da süz buldı. Fiker alışqanda, Qazan xanlığın yaulap alu tarixi döres gäwdäländerelergä tieş häm ul mädäni dialogqa wä tolerantnost', yäğni ber bereñä tüzemlek prinsiplarına tayanırğa tieş, digän basım yasaldı.Älbättä, fänni-gämäli konferensiädä respublika häm federal' xaqimiät taraflarına konkret täqdimnär dä äytelde.

Mäsälän, Tatarstan Däwlät Şurasına 15 oktäberne Qazannı yaqlawçılar köne dip iğlan itärgä, tarixçı ğalimnärgä Qazan xanlığı häm başqa törki däwlätlär turında obyektiv uqu äsbapları tudırırğa. Şulay uq mädäniät ministrlığına Qazannı yaqlap şaxit kitkännärgä häykäl quyunı tizlätergä häm oşbu konferensiäneñ materialların cıyıntıq itep bastırırğa digän täqdim kertelde.

Äye, tizdän bu tarixi data kilep citäçäk. Häm bıyıl anı milli xäräkät wäkilläre qaçıp-posıp, ğäyre räsmi genä tügel, xaqimiät belän bergäläp uzdırırğa niätlänälär, gärçä monıy süjet Qazan Kremlenä gel şiklänebräk qarağan mäskäwlelärgä oşap betmäsä dä.
XS
SM
MD
LG