Qazan yäşläre Qasıymğa säyäxättän qayttılar

Qazannıñ tatar yäşläre dä tik kenä yatmıy. İnde xäbär itkänebezçä, ber törkem yäş millättäşlärebez ütkän atna axırında Tübän Novgorod häm Räzän ölkäsenä säyäxätkä kittelär. Sişämbe, 29 oktäber könne, alar kire Qazanğa äylänep qayttılar. Bötendönya tatar kongressı häm «İnitsiativa» yäşlär fondı oyıştırğan bu säfärdä 20-läp keşe qatnaştı. Säyäxätneñ berençe köne Tübän Novgorodta ütte. Yäşlär şähär belän tanıştılar, «Mahinur» mädräsäsendä Tübän Novgorodta yäşäwçe millättäşlärebez belän oçraştılar. Andağı tatar yäşläre belän kiläçäkkä xezmättäşlek itü mäsälälären tikşergännär, Tübän Novgorod şähärendä yäşäwçe tatarlarnıñ milli, dini tormışı belän qızıqsınğannar, Qazannan alıp kilgän küp kenä kitap-jurnallar, audio-video tasmalar büläk itkännär. Tübän Novgorodtağı bu oçraşularnı Tatarstannıñ Tübän Novgorod ölkäsendäge daimi wäkile Vil İbrahimov ölkä diniä näzäräte belän berlektä oyıştırğan ide. Säyäxätneñ ikençe köne Qasıymda ütte. Yäşlär Qasıym xanlığınnan qalğan tarixi arxitektura istäleklären qarap, şähärneñ ğomumi häm tatar muzeylarında bulğannan soñ, monnan 5-6 yıl elek kenä barlıqqa kilgän tatar mäxälläsendä buldılar. Mäxällä mäçetendäge oçraşuda şähär xaqimiäte räise urınbasarı, mäxällä citäkçeläre, yäkşämbe mäktäbe uquçıları belän bergä, şaqtıy ğına millättäşlärebez dä cıyılğan. Çäy estäle artında Qasıym tatarlarına ğına xas bulğan milli rizıqlardan awız itep, qunaqlar häm xucalar şähärdäge tatarlarnıñ bügenge xäle, kiläçäktä saqlanıp qalu yulları turında söyläşkännär. Qazannan alıp kilgän büläklär dä taratılğan. Şulay uq, Qazan yäşläre şähärdän 10 çaqrımda urnaşqan Podlipki awılında buldılar. Qayçandır Şirin morzalarınıñ cäyge yal rezidensiäse bulıp torğan bu awılnıñ tatarça iseme Şırın bulğan. Xäzer bu awılda 900 keşe yäşi, şularnıñ illese genä tatar. Podlipkida tatar yäşläre cirle xaqimiät wäkilläre, awıl mädäniät yortı xezmätkärläre belän oçraştılar, Qazan qunaqları xörmätenä quyılğan konsertta buldılar, awılda saqlanıp qalğan mäçetkä kerep yul namazın uqıdılar. Xäyer, bu qızıqlı häm mawıqtırğıç säyäxät belän bez sezne äle täfsilleräk tanıştırırbız, xörmätle tıñlawçılar. Bu säfärdä bezneñ xäbärçebez Räfis Cämdixan da qatnaştı. Şuşı arada sez anıñ yazmaların da tıñlıy alırsız.