Accessibility links

“Küktaw” digän tatar näfis film premyerası buldı


“Küktaw” digän tatar näfis film premyerası buldı

Bäyräm aldınnan tağın ber küñelle premyera buldı. Kamal teatrı binasında xäzerge çorda töşerelgän berençe tatar näfis filmı kürsätelde. Uzğan ğasırda näfis filmnar töşerü turında xäbärlär bulsa da, tulı formatlı tatar kinoların kürgän yuq ide äle. Şunlıqtan teatr binası mädäni elita wäkilläre belän şığrım tulğan ide. “Küktaw” dip atalğan filmnıñ ssenarien Mansur Ğiläcev yazğan, bu süjetnı kinoğa töşerü eşenä rejisser-quyuçı İldar Yägäfärov alınğan, baş rollärne Kamal teatrınıñ baş rejisserı Färit Bikçantaev, anıñ 7 yäşlek ulı Yosıf başqara, şulay uq filmda Rawil Şäräfi, Rinat Tacetdin häm başqa kürenekle artistlar qatnaşa. Qazan uramnarı, timer yul stansiäläre, İdel buyları, Yuğarı Oslan yanındağı awıl uramnarı, Äcim bistäsendäge Begiçev uramındağı yaña yort fatirları fonında tatarça söyläşü, tatarça yäşäw manzarasın ekranda kürü bik qızıq buldı. Premyeradan soñ avtorlar kollektivın täbrikläp, bu könne tarixi waqiğa buldı, dip iğlan ittelär. Küktaw filmnı töşerüçelär Tatarstannıñ rayonnarı, şähärläre buyınça şuşı äsärne kürsätep yöriäçäklär. Respublika häm Konstitutsiä isän bulsa, bälki mondıy premyeralar yışraq bulır häm tatar filmnarı millättäşlärebez, başqort qärdäşlärebez yäşägän töbäklärdä kürsäteler dip ömetlänäse qala.

Yunıs Ätnäle
XS
SM
MD
LG