Mintimer Şäymiev: Konstitutsiä belän ğorurlanırğa kiräk

Tatarstan öçençe kön bäyräm itä. Gazetalar näşer itelmi, radio häm televidenie yışraq konsertlar, tok-şoular, näfis filmnar kürsätü belän mäşğül. Şulay da bu atnada uzğan bäyrämnär turında ara-tirä süjetlar kürenä. Tatarstan Konstitusiäseneñ 10 yıllıq yubileen respublika mäğlümat çaraları bik saran yaqtırttılar. Ä inde matbuğatta kürengän mäqälälärneñ isemnäre ük qıçqırıp tora: Восточный экспресс gazetası - «Konstitutsiäne teträtkän un yıl», Tatarstan xäbärläre – «Tatarstannıñ töp zakonı ülem tüşägendä yata» h.b. İñ optimistik ruxta yañğırağan çığışlarnıñ berse, möğayın, Tatarstan respublikası prezidentı Mintimer Şäymievneke bulğandır. Anıñ fikerençä, Konstitutsiäneñ iqtisadqa, mädäniätkä, tatar xalqınıñ üseşenä zur yoğıntı yasawı belän ğorurlanırğa kiräk. Bäxässez fiker. Läkin xätta bu optimistik möräcäğät tä kübräk ütkännärgä, tarixqa qarağan.