“Звезда Поволжья”: Tatarstanğa säyäsi höcüm köçäyä

Uzğan atnada Tatarstan Mäskäw tarafınnan moñınçı bulmağan säyäsi höcüm kiçerde. Anıñ oyıştırılğan ikänlege ap-açıq. Latin imlası turında qarar Rusiä Däwlät Dumasında qanun sıyfatın aldı häm bu kürälätä sabaq uqıtu ide. Çirattağısı Rusiä Yuğarı mäxkämäseneñ Tatarstan Däwlät Şurası Tatarstan Konstitutsiäsen federal' qanunnarğa yaraqlaştırudan çitläşä dip tanuı buldı. Rusiä belän Tatarstan arasında waqälätlär büleşü turında şartnamäneñ yaña variantı turında söyläşülär tuqtatıldı, dip başlana “Звезда Поволжья” gazetasınıñ Tatarstandağı säyäsi wäzğıätne taswirlagan baş maqäläse. Şuşı uq rätkä Rusiä televidenieseneñ “Вести недели” programmasınıñ uzğan yäkşämbedä çıqqan Tatarstanğa bağışlanğan tapşıruı quyıla. Bu tapşıruda Tatarstanda soñğı 10 yılda töşerep alınğan böten tiskäre süjetlar kürsätelde. Monda Kaşapov Basaev belän dä, millätçelärneñ Yuğarı Sovetnı şturmlawı da, gazütkärgeç şartlatuı da, Tatarstan Däwlät teleradiokompaniäseneñ 24 oktäberdä iñ yaxşı tatar yazuçılarnıñ berse Zölfät Xäkim qatnaşında tapşıruı da, Butlerov häykäle belän köräşü dä – bar da bar, dip yazıp çıqtı “Звезда Поволжья”nıñ baş möxärrire Räşit Äxmätov. Çınnan da, älege höcüm şul qadär köçle buldı, tatar cämäğätçelege, säyäsätçelär, jurnalistlar xätta beraz yuğalıp ta qaldılar şikelle. Bu xällärgä Tatarstan mäğlümat çaralarınıñ berençe reaksiäse uzğan sişämbe könne genä sizelä başladı häm alar älegäçä açıq pozitsiäsen belderä almıy.