Accessibility links

Кайнар хәбәр

Bötendönya tatar kongressında Rusiä eşquarları belän oçraşu uzdı


Bötendönya tatar kongressında Rusiä eşquarları belän oçraşu uzdı

Comğa könne Bötendönya tatar kongressında Rusiä eşquarlıqnı häm tatarlar yäşägän töbäklär belän iqtisadıy bäyläneşlärne üsterü komissiäse utırışı uzdı. Distälägän tatar bayları kiläçäktä bergäläp biznes yasaw, mal tabu turında söyläşte. Bu komissiäneñ räise Qazan şähäre administratsiä başlığı Kamil İsxakov biznes ähellären başqalabıznıñ 1000-yıllıq yubilee aldınnan qabul itelgän rekonstruksiä proektların tormışqa aşıruda qatnaşırğa öndäde.

Comğa könne Tatarstan säwdä palatasında, Qazan milli-mädäniät üzägendä häm Qazan yärminkäsendä dä eşquarlıq häm anıñ problemaları turında küp süzlär yañğıradı. Eşmäkärlärneñ cıyıluları tikmägä genä tügel ide. Pänceşämbe kiç Qazanğa Rusiä säwdä palatası räise Yevgeniy Primakov kilep töşte. Bu vizit räsmi töstä Tatarstan säwdä palatasınıñ 10 yıllığı uñayınnan dip iğlan itelsä dä, Primakovnıñ Qazanğa kilüe -- patşa küzeneñ wäzğıätne kürep kitü maqsatınnan da bulğandır. Älbättä, Yevgeniy Primakovnı xörmätläp Qazan Kremelendä Mintimer Şäymiev üze qabul itte. Soñraq Qazandağı sänäğät generalları belän oçraşıp söyläşü dä «awır yökle säyäsätçe» digän quşamat yörtkän Primakovnıñ Tatarstandağı xällärne centekläbräk öyränü yözennän bulğandır.
XS
SM
MD
LG