Rusiä sostavında milli respublikalar yuqqa çığarılaçaqmı?

Küñelsez xällär säyäsät belän dä bäylängän bula. Xäzerge säyäsi klimat Tatarstan häm ğömümän millätlär öçen caylı tügel. Küptän tügel Däwlät Dumasında bulğan parlament tıñlawlarınnan soñ milli respublikalarnı beterep, ereländerelgän ölkälär, guberniälär buldıru turında süzlär quyırdı. Bötendönya başqortları qorıltayınıñ Başqarma komitetı räise Äxmät Söläymanov imzalağan xatnı räis urınbasarı Ältäf Ğäyfullin Bötendönya tatar kongressı Başqarma komitetı citäkçelärenä tapşırdı. Başqort qorıltayı citäkçese milli respublikalarnı beterügä qatğıy qarşı çığıp, tatarlar häm başqa millätlär belän bergä respublikalarnı sütüne inqar itärgä çaqırğan. Tatar kongressı citäkçese Rinat Zakirov Ufadan kilgän xatqa üz imzasın quyarğa aşıqmadı. Bu oçraqta älege mäs’äläne bäyäläp, gubernalaştıru proektlarına xoquqıy bäyä birer öçen här yaqtan altışar keşe qatnaşlığında, yäğni 12 keşelek eşçe törkem tözü qulay dip tabıldı. Respublikalarnı saqlaw kiräklege turındağı mäs’älädä Başqort häm tatar qorıltaylarınıñ pozitsiäläre urtaq bulsa da, milli respublikalarda demokratiä, xoquqıy nigezlär, obyektiv informatsiä turında qaraşlar bik ük täñgäl kilep betmi. Alarnı ber-berse belän kileşterü öçen tatar häm başqort qorıltayları wäkilläre daimi dialog alıp barırğa tieş bula. Bu oçraqta Başqortostanda yäşäwçe tatarlarnıñ da teläkläre häm täqdimnäre, Rusiä respublikalarında xoquqıy häm säyäsi wäzğıät iskä alınırğa tieş bula.