Rusiäneñ Federatsiä şurası latinğa qarşı tözätmälärne rasladı

Qazanda milli tellär häm alarnı üsterü turında süzlär alıp barılğanda, Mäskäwdä dä älege mäs’älägä bitaraf tügellär. Çärşämbe, 27 noyäbr könne, Federatsiä Şurası Rusiä parlamentınıñ tellär turındağı qanunğa latinğa qarşı kertelgän tözätmälären rasladı. Dimäk xäzer, Rusiädä däwlät telläre bulıp sanalğan tellär barı tik kirill grafikasında ğına yäşi alaçaq. “Tatar-inform” agentlığı xäbär itüenä qarağanda, şuşı tözätmälär öçen 122 senator tawış birgän. 5 keşe – bitaraf qalğan häm nibarı 3 senator ğına bu qanunğa qarşı tawış birgän. Şuşı 3 qarşılarnıñ ikese – Kareliä respublikası wäkilläre, berse – Rusiä Federatsiä Şurasındağı Tatarstan wäkile Räfqät Altınbaev. Alar fikerençä, bu qanun milli tellärne beterügä kiteräçäk. Älegä Tatarstanda bu xaqta üz fikerlären belderüçelär işetelmäde.