Kön tärtiben tikşergändä dä, kierenkelek wäzğiäte kilep tudı. Däwlät Şurasınıñ fän, mäğärif häm milli mäs’älälär komissiäse räise Räzil Wäliev ike östämä mäs’älä täqdim itte. Anıñ berençese — Rusiä mäğärif sistemasında pravoslav mädäniätne uqıtunı kertügä mönäsäbät, ä ikençese — Rusiä xalıqları telläre turındağı qanunğa östämä kertü. Bu inde Rusiä federal' Şurasınıñ Rusiädä qullanışta kirillitsanı ğına qaldıruçı qanunnı raslawğa reaksiä. Ğädättä, sessiädä iñ kierenke, iñ kisken urınnarda prezident üzeneñ çirattan tış süz alu xoquqın faydalana. Räzil Wäliev mäktäplärdä pravoslav mädäniätne uqıtunı kertügä qarata mäs’äläne kön tärtibenä täqdim itkändä, monı ikençe märtäbä çuqındıru belän çağıştırğaç, Şäymiev, ägär dä älege niätlär ras bulsa, bu — axmaqlıq, dip atadı. Çınnan da, bu axmaqlıqmı, ällä yawız niät belän qılınğan ğämälme? Sessiäneñ berençe tänäfesendä «Azatlıq» radiosına Räzil Wäliev bolay dide:
Bu axmaqlıq, läkin bu ğadi axmaqlıq qına tügel, ä däwlät däräcäsendä eşlängän axmaqlıq. Şuñay kürä bez moña küz yomıp qala almıybız. Bezneñ Däwlät Şurası bu xaqta belderü qabul itep, anı Rusiä xökümätenä cibärsä, bu mäs’älä bälki uñay xäl iteler, dip uylıym.
Bu axmaqlıq, läkin bu ğadi axmaqlıq qına tügel, ä däwlät däräcäsendä eşlängän axmaqlıq. Şuñay kürä bez moña küz yomıp qala almıybız. Bezneñ Däwlät Şurası bu xaqta belderü qabul itep, anı Rusiä xökümätenä cibärsä, bu mäs’älä bälki uñay xäl iteler, dip uylıym.