Accessibility links

Кайнар хәбәр

Latin öçen häm latinğa qarşı köräş däwam itä


Latin öçen häm latinğa qarşı köräş däwam itä

Tatarstan Respublikasındağı keşe xoquqları buyınça wäkil Räşit Wäğizov latinnı tıyu turında Mäskäwgä möräcäğät cibärde. Ul Rusiädäge keşe xoquqları buyınça wäkil Oleg Mironovqa yullanğan. www.intertat.ru xäbärlärenä qarağanda, Räşit Wäğizov üz möräcäğätendä keşelärneñ häm xalıqlarnıñ telgä bulğan xoquqları ğomum qabul itelgän xoquq häm irekneñ ayırılmas öleşe bulıp toruın, alarnı Rusiä üz Konstitutsiäsenä nigezlänep saqlarğa tieşlegen bilgeläp ütä. Tatarstanlılarnıñ xoquqın yaqlawçı wäkil Däwlät Duması tarafınnan latinğa qarşı qabul itelgän qanunnı Rusiäneñ töp zakonına häm xalıqara xoquqi aktlarğa qarşı kilä dip bäyäli. Räşit Wäğizov üzeneñ Mäskäwdäge kollegasınnan Rusiä Konstitutsiäse ğarantı Vladimir Putinğa möräcäğät itüne häm kirill şriftı turında tözätmäne kire qağunı ütenä.

İnde xäbrä itkänebezçä, şundıyraq eçtälekle möräcäğätlärne Rusiä prezidentına Tatarstan Däwlät Sovetı da, Bötendönya tatar kongressı da yullağannar ide. Bälkem, berdäm tup atunıñ nindider näticäse dä bulır ide. Ämma berdäm salyut bulmadı. Äle genä www.tatnews.ru agentlığı Rusiäneñ baş möftie Tälğat Tacetdinnıñ ğacäpländergeç möräcäğäten tarattı. Şul uq adresatqa, yäğni Vladimir Putinğa möfti xäzrätläre üzeneñ borçınuın citkergän. Tik anıñ borçıluı başqa zıyalılarıbıznıqınnan ayırmalı bularaq, bötenläy başqa yaqtan. Tälğat Tacetdin añlamıy, nişläp Tatarstandağı yazuçılar häm tel belgeçläre kirillitsadan latinitsağa küçü turında mäğümat çaralarında tawış quptaralar. Baş möfti “mondıy xäl böten tatar mädäniätenä häm xalıqlar berlegenä zıyan kiterer ide”, dip yaza üzeneñ möräcäğätendä.

Küräseñ, ul Räşit Wäğizov häm başqa millätpärwärlärne borçuğa salğan keşe xoquqların millätneñ üzbilgelänüen sanğa suqmaw oçraqların yuqtan tawış quptaru, yomırqadan cöy ezläw dip kenä sanıy, axrısı. Xäyer, latinğa qarşı cırlawçılar arasında baş möfti ber yalğızı ğına tügel. www.tatnews.ru şul uq xäbärendä Başqortostannan ber törkem tatarlar isemennän yazılğan tağın ber möräcäğätne iskä ala. Biredä dä tatarlar öçen latinnıñ tiskäre yaqların sanap, “Nigä bezgä mondıy bülenü kiräk?” digän soraw quyıla. Şulay itep, Rusiä prezidentına latin mäsäläsenä qarağan qapma-qarşı eçtälekle möräcäğätlär kilä tora. Andağı sorawlarnı uqığaç, ul üze bezdän “Närsä kiräk soñ tatarlarğa?” dip soramasmı ikän.
XS
SM
MD
LG