Accessibility links

Rusiä Konstitutsiäse köne Tatarstanda da bäyräm itelä


Rusiä Konstitutsiäse köne Tatarstanda da bäyräm itelä

12 dekaberdä Rusiä xalqı Konstitutsiä bäyrämen bilgeläp ütte. Televidenie aşa törle süjetlar kürsätelde, cirle tapşırularda jurnalistlar ğadi xalıqqa älege bäyräm uñayınnan sorawlar birdelär. Arada anı belmäwçelär dä bar ide. Sotsiologlar fikerençä, rusiälelärneñ här unısı bu bäyrämneñ närsägä bağışlanğanın belmi dä ikän. Respondentlarnıñ 41% Konstitutsiä ilneñ tormışında zur rol' uynamıy, dip sanıy. Ä inde sorawlarğa cawap birüçelärneñ 7% “Ul Boris Yel'tsın öçen Dumanı buysındıru qoralı buldı “ dip äytkännär.

Mäğlüm ki, zamanında tatarstanlılar Rusiäneñ töp qanunın xuplamadılar, läkin waqıt wäzğıätne nıq üzgärtte. Bügen inde respublika citäkçeläre prezident Vladimir Putinğa Konstitutsiä bäyräme uñayınnan qotlawların yullıylar. Alarnıñ teläklärendä küpmillätle Rusiädä demokratiä prinsipları saqlansın, keşe xoquqları yaqlansın digän süzlär dä bar. Un yıl eçendä uzğan yulnı törleçä bäyäläp buladır. Anda artqa çigenülär dä, uñğa-sulğa taypılular da bulğandır. Läkin bernärsä açıq: zamana ul, cırda cırlanğança, üzgärmi, bez üzgäräbez. Nindi säbäplär arqasında - monısı da yaxşı bilgele.

Konstitutsiä könenä latinnı üz itkän millättäşlärebezgä Mäskäw “büläk” äzerläp quyğan ikän. Rusiä prezidentı Putin Duma tarafınnan latinğa qarşı qabul itelgän qanunnı imzalağan. Mondıy adım Rusiädä «käğäzdä ber, tormışta ikençe» digän xaqiqät'ne tağın ber qat rasladı. Çönki Konstitutsiä buyınça nindi imlada yazu, nindi teldä söyläşü - bu här xalıqnıñ üz eşe bulırğa tieş ide yuğisä. Şuña da citäkçelärebezneñ qupmillätle Rusiädä keşe xoquqların yaqlaw-saqlaw turındağı teläkläre bik urınlı häm aktual' bulıp çıqtı. Bügen binalarda ike räsmi bayraq cilferdi, xalıq yal itä, bäyräm däwam itä.
XS
SM
MD
LG