Accessibility links

Кайнар хәбәр

Möselman dönyası Ramazan ğäyeten bäyräm itä: qotlawlar


Möxtäräm tıñlawçılar, bäyrämnäregez qotlı bulsın!

Xäzerge tormış, oçrap torğan awırlıqlarına qaramastan törle bäyrämnärgä, tantanalı könnärgä şaqtıy bay, aralarında yasalmaları da citärlek. Läkin qalğannarı, çın wä eçkersez şatlıq kiterä torğannarı arasında da Ramazan ğäyete üzeneñ yaqtılığı, kütärenkelege belän ayırılıp tora. Qör’äni-Kärimdä äytelgänçä, möselmannar ay buyı Allah yulında buluwın raslap uraza totqannan soñ, Ramazan azağında alarnı şatlıqlı bäyräm, awır sınawlarğa bireşmi imannı nığıtu xisen tantana itü kötä. Här mö’min üz ixtiar köçeneñ nıqlığın, ruxı xaläte xaqına tübänçel teläklären ciñä aluwın, Allah tağälägä birelgänlegen bäyräm itä, häm şunıñ belän bergä, tirä-yündäge üze tösle başqalarnıñ da şatlığın, tantanasın urtaqlaşa. Şuña da bu ayırım törkemnär, ayırım şäxeslär genä tügel, ä bar millät, bar qawem, bar mö’min-möselmannarnıñ bäyräme. Ramazan ğäyeteneñ üzençälege menä şunda kürenä. Azatlıq radiosı tapşıruların tıñlawçılar arasında möselmannar şaqtıy, häm alar bu könnärdä bäyräm itä ikän, bu bezneñ öçen dä şulay digän süz. Dönyadağı soñğı xällär, islam dine, anıñ başqa dinnär wä mädäniatlär belän aralaşıp häm kileşep yäşäwe turında qaynar bäxäslär uyattı. Läkin alar nigezdä, islamnan yıraq torğan, anı belmägännär tarafınnan quyırtıla. Belgännärgä isä, möselman dineneñ, başqaları kebek ük, tınıçlıq wä solıx dine ikänen añlatu kiräk tügel. Uraza totıp, ğadi ikmäk wä suğa integüne üze tätep qarağan keşe, başqalarğa açlıq teli almıy, üz yazmışın xäl itüne Allah tağälägä tapşırğan zat, üze başqalar yazmışın xäl itügä cör’ät itmi. Monı añlağan yuğarı citäkçelär bügen dönya möselmannarın izge Ramazan bäyräme belän qotlıy. Alar arasında Quşma Ştatlar prezidentı George Bush ta bar.

Audio

Cämäğätem Laura, Amerika häm bar dönya buylap yäşägän möselmannarğa iñ izge teläklärebezne yullawğa quşıla, Allahınıñ sezgä şuşı Ramazan ayında töşkän räxmätläre yıl buyı sezneñ belän bulsın di amerikan prezidentı Bush. Başqa citäkçelärneñ qotlawları turında sez bezneñ Qazan wä Ufadağı xäbärçelärebezdän äle işetersez, xörmätle tıñlawçılar. Ä xäzer, Azatlıq radiosı tıñlawçıların Ramazan ğäyete belän, Başqortstan Diniä näzartäte möftie Nurmöxämmät xäzrät Niğmätulla qotlıy.

Audio

Sez Başqortstan möftie Nurmöxämmäd xäzrät Niğmätulla täbriklären tıñladığız. Ğäziz qärdäşlär, şuşı şatlıqlı wä möqäddäs könne, yuğarıda äytelgän bäyräm qotlawlarına, Azatlıq radiosı xezmätkärläre dä quşıla. Allahı tağälä qılğan urazalarığıznı qabul itep, kiläçäktä tä tıñlawçılarıbıznı üz yaqlawınnan qaldırmasın, iminlektä, sawlıqta, tigezlektä yäşärgä nasıyp itsen digän teläktä torabız. Yıl däwamında radiobıznıñ dini tapşıruların alıp barğan Xäyretdin Sadıyqnıñ bäyräm uñayınnan häm bäyräm turında üz süze bar, häm min, Kärim Kamal, sezgä, "Bäyrämegez möbäräk bulsın!" dip mikrofonnı aña tapşıram.

Audio
XS
SM
MD
LG