Säyäsätkä qağılışlı tağın ber waqiğa – Rusiä prezidentı Vladimir Putinnıñ xalıq sorawlarına radio-televidenie aşa cawap birüe. Bu yulı televideniedan kürsätelgän qadär Vladimir Putinnıñ Qazan keşeläre sorawlarına cawap birmägäne belende. Läkin Osetiädän ber abzıynıñ konfessiälär arasındağı mönäsäbätlärgä qağılışlı soraw birgändä, İdel buyında çirkäw cimerälär digän süzläre küplärneñ xäterenä señep qalğandır. Bu çama belän Privolj'ye dip äytü, älbättä, Çallıdağı xällärgä işarä. Menä şulay, qanunnarnı bozıp, röxsät itelmägän urında tözeläse çirkäw urınına quyğan çasovnya cimerüne Tatarstandağı mäğlümat çaraları obyektiv tasvirlamauları arqasında älege xäbär Rusiäneñ iksez-çiksez krıyenda yäşäwçe xalıqlarğa İdel buyında çirkäw cimergännär bulıp barıp ireşkän. Älege çasovnyanı işügä qarata patriarx Aleksey II Mintimer Şäymievkä xat yazıp, anda Tatarstanda konfessiäara mönäsäbätlär normadan yıraq tora, dip yazuına qarata Tatarstan kommunistları liderı Rusiä Däwlät Duması deputatı Aleksandr Saliy “Звезда Поволжья” gazetasınıñ yaña sanında mönäsäbäten belderde. Mäğlüm ki, äle beraz soñraq “Известия” gazetasında Çallıdağı xällärne bäyäläp, patriarxnıñ ber wäkile Tatarstanda pravoslaviäneñ xäle Çeçnyadän da naçarıraq, dip cibärgän ide. Kommunistlar başlığı Aleksandr Saliy pravoslav ruxanilarınıñ mondıy bäyäläwlären “превеликий перебор”, yäğni “çiktäntış arttıru” dip atadı.
