İnde yañadan “Yaña ğasır” televideniesenä qaytıyq. Rusiäneñ törle töbäklärendä şuşı televizornı qarawçılar yäkşämbe könne qänäğät qalğandır, çönki “Yaña ğasır” Rusiäneñ figuralı şuu çempionatınıñ final öleşen kürsätte. Qazanda ütkän şuşı yarış bik matur häm qızıqlı buldı. Näq menä televizordan qarap soqlana torğan. Rusiä çempionı isemen Yelena Sokolova yawladı, ataqlı İrina Slutskaya bozda yığılıp, ikençe urında qaldı. Şuşı çempionat könnärendä Qazanğa Rusiäneñ sport ministrı Väçeslav Fetisov kilgän ide. Ul prezident Mintimer Şäymiev belän oçraşıp, Tatarstandağı sportnıñ torışın maqtadı. Şartlar äybät sezdä, dide ataqlı xokkeyçı. Kiläçäktä dä Qazanda Rusiä çempionatların häm xalıqara yarışlarnı ütkärü turıda söyläştelär.
