İzrail’ xärbiläre äytüençä, İordaniä häm Süriä çikläre tiräsendäge soldatlar qorallı keşelär törkeme belän atışıp alarnıñ bersen ütergän. Gaza Sızığındağı qaçaqlar lagerenda ber taksist xärbilärgä ut açqannan soñ cawap utı belän üterelde dip xäbär itelä. Fälestinlelär äytüençä, Könbatış Yarnıñ Seidä awılında ber üsmer İzrail’ xärbiläreneñ şikle fälestin yortın cimerüen qarap torğanda İzrail’ märgäne anı atıp ütergän. Yewropa Berlege İzrail’neñ fälestin delegatsiäsenä Londondağı konferensiägä barunı tıyu qararın tänqitläp çıqtı. Xäzerge waqıtta Yewropa Berlegendä prezidentlıq itüçe Gretsiä xökümäteneñ belderüendä fälestin delegatsiäseneñ yulın kisü “näfrätne häm extremizmnı nığıta” dielä. İzrail’ uzğan yäkşämbedäge 2 intixar terror höcümennän soñ fälestin delegatsiäsenä Londonğa barunı tıyu turında qarar çığarğan ide.
