Accessibility links

Кайнар хәбәр

Germaniä tatarları jurnalınıñ ikençe sanı dönya kürde


Germaniädä yäşäwçe tatarlarnıñ eşçänlege turında mäğlümat soñğı waqıtta torğan sayın yışraq kürenä başladı. Alar bıltır Frankfurtta Saban tuyı ütkärgännär ide. Şul uq yılnı Goethe häm Schiller ile tatarları üzläreneñ jurnalların da çığara başladı. Şuşı könnärdä genä anıñ ikençe sanı dönya kürde. Anda mäqälälärne tatarça da, urısça da, almança da uqıp bula. Berlinnan İldar Xarisov üzeneñ niçek Germaniägä kilüe, Berlinda urnaşuı, andağı xalıqnıñ tatarlar belän qızıqsınuı, «Azatlıq» tıñlawçılarına tanış ğalimä Margaret Ersen Raş turında yaza. Münxennan Täkmilä Mathiews tuğan yaqlarına, Uralğa, Başqortstannıñ Salawat rayonına qaytuı xatiräläre belän urtaqlaşa. Jurnalda Amerika Quşma Ştatlarınnan alınğan yazma da bar. Anda yäşägän, ämma ğömereneñ küpmeder öleşen Münxenda ütkärgän Sabircan Bädretdin «Tatar New-Yorkı» digän mäqälä yazğan. Älege matbağanıñ möxärrirläreneñ berse, Aliä Taysina tatar tarixına — Altın Urda, Qazan xanlığına qarağan yazmalar urnaştırğan. Şunısı da qızıq, alar almança da birelä. Uquçı anda Qaz ömäse turında da mäğlümat taba ala. Şunda uq tatar pärämäçen niçek peşerergä dä öyränep bula.

Bari Dianov häm Aliä Taysina äzerlägän şuşı san, alar üzläre yazuınça, Münxenda yäşäwçe millättäşebez Ğarif Soltannıñ matdi yardäme belän çıqqan. Alar aña şunıñ öçen zur räxmätlären belderälär. Häm yaqın aralarda Bavariä başqalasında german tatarları wäkilläreneñ oçraşuı ütäçäk, dip xäbär itälär. Kiläse sannan başlap jurnal «Bertuğan» digän isem astında çığaçaq.
XS
SM
MD
LG