Yaña yıldan soñ Tatarstanda säyäsi tormış canlana bara. Tatarstannıñ Üzäk saylaw komissiäse räise Anatoliy Fomin İTAR-TASS xäbärçesenä “bez Däwlät Şurasına waqıtınnan aldan saylawlar ütkärügä tulısınça äzer”, dip belderde. Ul şulay uq älege saylawlarnıñ Rusiä Däwlät Dumasına saylawlar belän bergä ütkärü ideyäsen xuplawın da äytte. Şulay itep, Däwlät Şurasına waqıtınnan alda saylawlar anıñ qanuni wäkälätläre tämamlanuğa ber qala, bıyıl dikäber ayında ütkäreläçäk bulıp çığa. Ber atna çaması aldanraq Tatarstan Däwlät Şurasına saylawlarnı aldanraq ütkärü farazı turında Däwlät Şurası räise Färit Möxämmätşin beldergän ide. Läkin ul monı ber iskärmä belän äytte. Ul saylawlar, Däwlät Şurası deputatlar saylaw turında mökämmäl qanun äzerläp ölgerelsä, älege qanun federal' qanunnarğa turı kilsä genä ütäçäk dide. Mäğlüm ki, Tatarstannıñ yaña Konstitutsiäsendä qaralğança, yaña saylanğan parlamentqa 50 deputat kerergä tieş häm alarnıñ yartısı partiä isemlekläre buyınça saylanğan deputatlardan torırğa tieş. Läkin federal' qanunnar buyınça ike palatalı parlament ta bulırğa mömkin. Küptän tügel Rusiä prezidentı Vladimir Putinnıñ Başqortstanda yal itkän waqıtta Magnitogorski häm Başqortstan citäkçeläre belän oçraşıp, näq menä şul tizdän Rusiä töbäkläreneñ zakon çığaru häm başqarma xakimiät strukturalarında üzgäreşlär turında söyläşkännär, dilär. Monı “Известия” häm “Коммерсатъ” gazetaları rasladılar. Rusiä prezidentı bar töbäklärne dä tigezläw ber qalıpqa salunı zakonlaştırırğa niätlägän ikän.
