Accessibility links

İminlek Şurası mäglümät çeltärläre häm texnologiälärne kamilläşterü programmasın xupladı


Tatarstanda İnternet, elektron mäğlümat dönyasın yaxşı üzläşterüçelär yıldan-yıl arta. Xäzerge köngä Tatarstanda İnternet çeltären qullanuçı möştärilär sanı 90 meñgä citkän häm Tatarstan bu kürsätkeç belän İdelbuyı federal' okrugında berençe urınğa çıqqan. Bu turıda 15 ğinwarda uzğan Tatarstan İminlek Şurası utırışında äytelde. Respublikanıñ informatika, elemtä ölkäsendä xälläre häm kiläçäktä bu ölkädä eşlänäse eşlär turında iqtisad häm sänäğät ministrınıñ berençe urınbasarı Alevtina Kudryavseva notıq tottı. İnformatika, İnternet qullanuçılar küp häm bu ölkäne tärtipkä salırğa waqıt citkän. Xoquqi problemalar da bar. Şulay, uzğan yıl däwlät häm şäxsi mäğlümati resurslarğa höcümnär 30% artqan. Şuña kürä tizdän Tatarstanda berdäm mäğlümatı resurs buldırıla, mäğlümat, elemtä tarmağında eşläwçe şirkätlär berläştereläçäk. Yaqın arada Däwlät Şurası Tatarstannıñ mäğlümatı resursları turında maxsus qanun çığaraçaq.

Tatarstan İminlek Şurası tikşergän häm xuplağan “Mäğlümatläşterü häm elemtä ölkäsendä respublikanıñ däwlät säyäsäte nigezläre” digän programmada ayırım urın awıl ciren, awıl xalqın kompyuterlaştıru, elektron elemtä çaraları belän tä'min itü qaralğan. Xäzerge köngä Tatarstan mäktäpläreneñ barı tik 1/10 öleşeneñ bötendönya mäğlümat çeltärenä kerü mömkinlege bar ikän. İminlek şurası utırışında prezident Mintimer Şäymiev 2007 yılğa qädär awıl cirendä härkemneñ İnternetqa kerü mömkinlegen buldırırğa kiräk, dide.

Şulay itep, Tatarstannıñ iminlek şurası 15 ğinwarda “Mäğlümatläşterü häm elemtä ölkäsendä respublikanıñ däwläti säyäsäte nigezläre turında”ğı dokumentnı xupladı. Xäzer anı prezident raslarğa, yäğni ukaz imzalarğa tieş, ä bıyılnıñ 1 aprelenä qädär xökümät älege programmanı tormışqa aşıru öçen tieşle xoquqi nigezlämälär äzerlär, inşalla.

Süz uñayınnan, internetçılarğa qağılışlı tağın ber xäbär. Pänceşämbe könne Qazanda İntertat.ru säxifäseneñ tatar redaksiäse möxärrire Älfiä Miñnullina tatar internetçıları forumı ütkärde.
XS
SM
MD
LG