Mäskäw. Rusiäneñ saqlanu ministrı Sergey İvanov, äl-Qaidä çeltäreneñ küpläp yuq itü qorallarına iä buluwına kirtä quyu maqsatında xalıqara kontrol’ne köçäytergä çaqırdı. Räsmi säfär belän Mäskäwgä kilgän hind saqlanu ministrı George Fernandes belän oçraşqannan soñ ul, Taliban häm äl-Qaidä kebek törkemnärneñ atom yäisä başqa şundıy qorallarnı üz qulına töşerergä mataşuwı bik mömkin dip belderde. Şul ixtimalnı buldırmas öçen İvanov, xalıqara anti-terror berektäşlegendäge här taraf başqalar belän bik tığız xezmättäşlek itep, andıy qorallarnı kontrol itüne köçäytergä tieş dip isäpli. İvanovnıñ şuşı belderüwenä qädär, Rusiäneñ tışqı eşlär ministrı urınbasarı Georgi Mamedov pänceşämbe könne, Mäskäw, äl-Qaidäneñ atom qoralına Pakstan aşa iä bula alu ixtimalına bik borçıla dip äytkän ide. Saqlanu ministrı Sergey İvanov isä bügen, Rusiäneñ Hindstan belän xärbi xezmättäşlege Könyaq Aziädäge qüwät balansın bozmıy, häm ul kiläçäktä tağın da artaçaq dip belderde.
