Accessibility links

Кайнар хәбәр

Rusiä wäkile üzeneñ Pxenyan säfäre xaqında


Rusiäneñ maxsus wäkile, tışqı eşlär ministrı urınbasarı Aleksandr Losyukov sişämbedä üzeneñ Tönyaq Koreä säfären tögälläp yänä Qıtay başqalası Pekingä kilde. Şuşı säfären ul üze näticäle dip bäyäli, häm Tönyaq Koreäneñ atom programması tiräsendäge nizaqnı tınıç yullar aşa çişü ixtimalı ömetle kürenä dip belderä. Waşington isä älege mäs’äläne Berläşkän Millätlär Oyışmasında qarawnı teli.

Losyukovnıñ Pxenyannan qaytuwı aldınnan ğına Quşma Ştatlarnıñ däwlät sekretare Colin Powell düşämbe kiçen, Washingtonnıñ Tönyaq Koreä mäs’äläsen Berläşkän Millätlär Oyışması qaramağına çığarırğa teläwen qabatlağan ide. Anıñ fikerençä, Pxenyannıñ küpläp yuq itü qoralların cäyeldermäw kileşüwennän waz kiçärgä cıyınuwı şaqtıy qurqınıç ğämäl, şuña kürä anı İminlek Şurası üze tikşerergä tieş. Kilep tuğan kierenkelekne Berläşkän Millätlär qısalarında xäl itü omtılışı tabiği älbättä, läkin bu axırğı çiktä Tönyaq Koreä öçen bik tä awır näticägä kiterä ala, İminlek Şurasınıñ şul ilgä qarşı yaña iqtisadi wä säwdä, xätta säyäsi dä çikläwlär kertüwe bik ixtimal. Pxenyandağı citäkçelek isä monı üzenä qarşı suğış iğlan itügä tiñli. Şuña kürä Tönyaq Koreäneñ kommunistik başlıqları turıdan-turı Quşma Ştatlar belän söyläşergä teli. Monı anıñ yaqın berektäşläre Qıtay häm Rusiä dä yaqlıy, äle Pxenyanğa kitkänçe ük Aleksandr Losyukov, qarşılıqlarnı ike yaq, yäğni amerikannar häm Tönyaq Koreä ber östäl artına utırıp, ikäwläşep çişärgä tieş dip beldergän ide. Üzeneñ säfären ul barı tik, yaqlarğa bulışlıq itü, häm hiç kenä dä aradaşlıq tügel dip bäyäläde. Qıtay tışqı eşlär ministrı da, üz ileneñ Tönyaq Koreä belän aralaşuwı täcribäsenä işarä yasap, bu oçraqta iñ qulayı Waşingtonnıñ turıdan-turı Pxenyan belän söyläşüwe dip belderde. Şul uq waqıtta, äle genä Qıtay wäkilläre belän söyläşülär öçen Pekindä bulıp kitkän John Bolton, amerikan däwlät sekretareneñ urınbasarı, Tönyaq Koreä mäs’äläsen İminlek Şurasında qarawğa Qıtay ällä ni zur qarşılıq kürsätmi dip äytte. Yaqlar moña üz qaraşların älegä tulısınça açıqlap betermägän bulsa kiräk. Ul arada inde Pxenyannan kire Pekingä kilgän Aleksandr Losyukov, üzeneñ Tönyaq Koreä wäkilläre belän söyläşülären bik yuğarı bäyäläde.

Audio

Pxenyanda berniçä, şaqtıy faydalı häm näticäle küreşülär buldı, häm min üzemneñ andağı söyläşülärem xaqında prezidentqa citkeräçäkmen dide Rusiäneñ tışqı eşlär ministrı urınbasarı. Näq menä üzeneñ başta Putinğa xisap biräçägenä işarä utep Losyukov Pxenyandağı söyläşüläre xaqında täfsilleräk mäğlümat birüdän totılıp qaldı, ämma tulayım alğanda, qarşılıqlarnıñ çişelü ixtimalı şaqtıy ömetle dip belderde.

Audio

Ägär dä qatnaşı bulğan ike taraf ta moña äzer bulsa dip östäde Losyukov. Äle Pxenyanda çaqta uq ul Rusiäneñ İTAR-TASS agentlığına, Tönyaq Koreä üzendäge atom programmasınnan waz kiçüwe öçen Waşingtonnan yazmaça, yäğni süzdä genä tügel, ä ber kileşü räweşendä üzenä iminlek garantiäläre teli dip beldergän ide. Alar Pxenyanğa üzen imin xis itü häm dönya belän qurıqmıyça aralaşuwı öçen kiräk dip belderde Rusiä wäkile. Tönyaq Koreädä çaqta ul ilneñ kommunistik yulbaşçısı Kim belän dä oçraştı, şuña kürä ul äytkän süzlärne Pxenyannıñ soñğı qaraşı dip qabul itärgä bula. Läkin Kim Waşingtonnıñ üze belän turıdan-turı söyläşüwen teli, ä annan isä älegä, şuşı mäs’äläne Berläşkän Millätlärneñ İminlek Şurasına çığaru teläge turındağı belderülär genä işetelä.

Kärim Kamal, Praga.
XS
SM
MD
LG