Qazanğa cırçı Zölfiä Kamalova kilä

Tağın ber mädäni yañalıq. Fevral' ayında Qazanğa cırçı Zölfiä Kamalova kiläçäk. 15 fevral' könne «Qazan» milli-mädäni üzägendä ul üzeneñ berdän-ber konsertı belän çığış yasayaçaq. Küp kenä tatarstanlılar Zölfiä Kamalova digäne tağın nindi yaña cırçı inde, dip sorarlar. Çönki küp kenä cirlärdä danı taralğan Zölfiä Kamalova respublikada ällä ni bilgele cırçı tügel. Ul Avstraliädä yäşäp icat itüçe şäxes. Şunısı qızıq, Tatarstannan bik yıraqta yäşäwenä dä qaramastan Zölfiä Kamalova tatarça cırlıy, tatar cırların dönyağa tarata. Xäyer, Qazanda da bu cırçını yaratuçılar şaqtıy. Şunı istä totıp häm Tatarstan, Qazan tamaşaçısına älege cırçını tanıtu telägennän anı başqalabızğa çaqırırğa bulğannar. İnde äytkänebezçä, Zölfiä Avstraliädä yäşi. Şuña kürä, anı Qazanğa kiterü ciñel eş tügel, älbättä. Şuña kürä, bez bu xaqta tulıraq mäğlümat alırğa telädek. Älege konsertnıñ töp oyıştıruçısı —Bötendönya Tatar kongressı Başqarma komitetı ikän. Ä konsertqa äzerlek çaraları turında oyıştıruçılarnıñ berse Älfiä xanım Miñnullina söyli:

Audio

15 fevral' könne Qazanda Avstraliädäge cırçı Zölfiä Kamalovanıñ konsertı bulaçaq. Min bu cırçı turında berniçä yıl elek, anıñ ätisennän beldem. Ul bezgä bu turıda xäbär yazıp cibärgän ide. Soñraq İnternetta anıñ saytı açıldı. Şunnan inde bez kübräk mäğlümatlar tuplıy aldıq, anıñ cırların da tıñlıy başladıq. Qazanda konsert quyu telägen Zölfiä berençe üze belderde. Anıñ Tatarstanda da çığış yasıysı bik kilä ikän. Bez cırçı belän xatlar alıştıq, söyläştek tä, min Zölfiä Kamalovanıñ konsertın oyıştıru täqdime belän Bötendönya tatar kongressı citäkçelegenä möräcäğät ittem. Alar minem täqdimne xupladılar. Şulay itep, 15 fevral'dä konsert bulır, dip ömetlänäbez.

Gölnaz İlgizär, Qazan