Accessibility links

Кайнар хәбәр

Tatarstanda regional üseş bankı bulaçaq.


Tatarstanğa Colorado ştatı gubernatorı kilgän ide. Näticädä, neft ölkäsendä xezmättäşlek itü turında ike yaqlı kileşü tözelde. Amerika qunağı belän bergä, Quşma Ştatlardan Tatarstanğa ber möhim xäbär dä kilep ireşte. Tatarstan, Amerikanıñ üseş häm säwdä agentlığı bülep birä torğan $176 meñ dollarlıq grantın otqan. Bu aqçalar regional üseş bankın buldıru öçen birelä. Şul xaqta Tatarstannıñ säwdä häm tışqı mönäsäbätlär ministrı Xafiz Salixov xäbär itte. Älege aqçanı Hogan&Hardson şirkäte bülep birä, bu oyışma belän kileşüne Ministrlar Kabinetı qarşındağı xalıqara agentlıq töziäçäk. Bu Tatarstan bankın oyıştıruda xalıqara fondlar häm başqa finans oyışmalar qatnaşırğa tieş. Yewropanıñ üseş häm tözekländerü bankı belän dä söyläşülär alıp barıla. Bu oyışmanıñ töp kapitalın oyıştıruda däwlät tä qatnaşa ala ikän, läkin anıñ öleşe 25%-tan artmasqa tieş. Banknı oyıştıru eşläre 1 yıl eçendä tämamlanırğa tieş.

Tatarstandağı iqtisadıy yañalıqlar soñğı waqıtta şul bank, neft häm maşina şirkätläre tiräsendäge xällärgä qağıla. 3 fevral könne «Tatneft» oyışmasınıñ direktorlar şurası bula. Anda bu oyışmanıñ neftne nindi bäyädän satu turında süz barırğa tieş. Qayber mäğlümätlärğä qarağanda, Tatarstan cirenä «Lukoil» häm «Yukos» kebek ere neft şirkätläre dä kilep eşli başlarğa mömkin. Alar «Tatneft» oyışması belän köndäşlek şartlarında eşlärğä tieş.
XS
SM
MD
LG