Xäbärlärgä qarağanda, NATO räsmiläre Tönyaq Atlantik şurasındağı söyläşüdä NATO-nıñ yardämçe role mäs’äläse bügen xätta kütärelmäde dä dip äytkän. 2 kön elek NATO General’ Sekretare George Robertson NATO Törkiägä yardäm itü çaraların qararğa tieş digän ide. Ämma bügenge oçraşuda Fransiä, Germaniä, Belgiä häm Lüksemburg diplomatik çaralar häm BMO qoral tikşerüläre yardämendä suğışnı buldırmıy qalu mömkinlege bulğanğa kürä xärbi planlaştırunı başlarğa äle bik irtä dip belderde. Bu ayda Quşma Ştatlar Törkiägä küzläw oçqıçları häm Patriot raketaları cibärüne, Urta diñgezdä xärbi kizüne köçäytüne täqdim itkän ide. AQŞ täqdimnärendä Ğiraqtağı suğıştan soñ NATOnıñ humanitar häm tınıçlıq saqlawda töp rolne uynawı turında da äytelde. Bügen Törkiä Quşma Ştatlarnıñ täqdimen xuplıyaçağın belderde. Bu täqdimne uzğan atnada Fransiä, Germaniä, Bel’giä häm Lüksemburg kire qaqtı. Xäzer NATO kiläse çärşämbedän soñ NATO äğzaları urtaq ber qararğa kilergä mömkin dip belderä.
