Accessibility links

Кайнар хәбәр

Älfiä Miñnullina: «Tatarlar säyäsi bäyä birüdän çittä qalmasın»


Tatarstanda iñ köçle säyäsätçe kem? Bu atnada kemneñ abruyı yuğarıraq buldı? Menä şuşı ğadi genä sorawğa cawap birüçe keşene tabuı ciñel tügel. Çönki Prezident Mintimer Şäymiev Şveytsariädä yal itä, täxet tiräsendäge başqa citäkçelär üz wazıfaların üti. Kemneñ, nindi däräcädä buluın häm Qazan Kremlennän niçä adımda yörüen bilgelärgä teläweçlär genä bixisap. Äle genä tatar.ru İnternet säxifäsendä respublikadağı 25 abruylı şäxesneñ isemlege elende. Ämma bu isemlekne däwlät oyışması tügel, ä bälki yarım xosusıy, yarım säyäsi, yarım säwdä gäzite “Вечерняя Казань” bilgelägän ikän. Täcribäle keşelär äytüençä, nigezdä, bu säyäsi tamğalar xaqiqättän älläni yıraq kitmägän. Bigräktä, 1-2 urınnar. İñ yuğarıda M.Şäymiev, 49 bal belän, ikençe urında, näq Konstitutsiädä kürsätelgänçä, premyer-ministr Röstäm Miñnexanov, ul 47 bal cıyğan. 3nçe urında Prezident apparatı citäkçese Äğzam Ğubaidullin. 4nçe urında «Tatenergo» berläşmäse citäkçese İlşat Färdiev, ä Qazan şähäre başlığı Kamil İsxaqov 5nçe urında, añardan soñ 6нче urında Däwlät Şurası räise Färit Möxämmätşin kürsätelgän. 7-8 urınnarnı «Tatneft» berläşmäse citäkçese Şafäğät Taxautdinov häm «Taif» kompaniäse direktorına aqıllı kiñäşlär birüçe Radik Şäymiev bülgännär. Annan Yevgeniy Bogaçev, Äsxät Säfärov, bankir Robert Musin, premyer-ministr urınbasarları Rawil Muratov, Marat Äxmätov, Vladimir Şvetsov, Aleksey Poxomov, şulay uq, Prezident kiñäşçese Rafael Xakimov, prokuror Kafil Ämirov, «Tatspirtprom» citäkçese Röstäm Şäyxetdinov, Däwlät Duması deputatı Oleg Morozov häm başqalar bar.

Härqaysınıñ küpme bal cıyuı, yözdän ber qädär tögällek belän kürsätelgän. Efir telekanalınıñ analitik tapşıruında älege reyting bazarın ayırım tikşerdelär. Politolog Midxät Faruqşin, bu bäyälärneñ tögäl bulmawın bilgeläde. Tä'sirlekneñ uñay yaqtanmı, tiskäre yaqtanmı ikänlegen belep bulmıy. Qayber säyäsätçelär häm citäkçelär xalıqqa fayda kiterep, ikençelär dönya cimerep yäisä respublikağa zıyan salıp ta abruy qazanalar. Nişläpter elege reytinglardan KamAZ direktorı Kogogin töşep qalğan. Tatarça çığuçı «Nur» ğäziten yapqan keşegä, şul kiräk aña, dip quanırğa bula. Sergey Şaşurinnı iskä almawlarına da eç poşmıy, Aleksandr Saliy da, respublika faydasına eşlämi, tuydırıp bette, anıñ däräcäse töşte, diyuçelär bar. Ämma da läkin bu keşelär isän häm tormışqa mäğlüm däräcädä tä'sir itüdän tuqtamağannar. Midxät Faruqşin fikerençä, bu reytingta Färit Möxämmätşin häm Kamil İsxaqovnıñ real' totqan urınnarın yasalma tübänäytkännär. Berdäm Rossiä partiäseneñ Tatarstan bülegendä yanıp eşläwçe Norlat başlığı Fatıx Sibgatullinnıñ iskä alınmawına da iğtibar itüçelär bar. Xäyer, bu bit ber şähär gäziteneñ säyäsi farazları ğına. Tatar jurnalistları, başqa säyäsätçelär niçek qarıy ikän bu mäsäläğä? Şul soraw belän bez İntertat.ru elektron gäziteneñ tatar çığarılışı redaktorı Älfiä Miñnullinağa möräcäğät ittek.

Audio

İntertat.ru elektron gäziteneñ tatar çığarılışı redaktorı Älfiä Miñnullina tatar internetçılarınıñ cıyılışı, üzara aralaşuı kiräklegen äytte. Ğomumän, säyäsättä millättäşlärebez üz urınnarın, üz urınnarın häm däğwäların üzläre bilgelämäsä, monı başqalar bik äybätläp tamğalap quyalar. Şul uq «Вечерняя Казань» gäziteneñ reyting ülçäwçeläre arasında, ber genä dä tatar jurnalistınıñ bulmawı, tatarça eşlewçe televidenie, radio, gazeta, jurnal eçtälege belän tanış bulmağan kileş tä, Tatarstannıñ säyäsi temperaturasın ülçäw tik tomalğa tügel. Bu isä tatar mänfäğätlären, büdjetqa kergän tatar salımnarın, reklama bazarınnan çitlätelüçe tatar telen işettermäs häm kürsätmäs öçen eşlänä. Şunısı xaq, tatar häm rus tellären belüçe jurnalistlar, säyäsi ekspertlar üzläre teläsä nindi reyting bilgeläp, törle sotsiologik tikşerülär ütkärä alalar.
XS
SM
MD
LG