«Törkiäneñ xakimiättäge Ğädellek häm Täräqqiät partiäse citäkçese Räcäp Tayip Erdoğan, kiläse ayda Siirt töbägendä ütäçäk östämä saylawlarda qatnaşaçaq, häm ciñgän oçraqta, Törkiäneñ kiläse premier-ministrı bulaçaq.» Bu turıda bügen partiäneñ yuğarı räsmie, premier-ministr urınbasarı Mäxmät Ali Sahin äytte. Zamanında dini näfrät uyatuda ğäyeplängän Erdoğan, uzğan yılnıñ noäberendä ütkän parlament saylawlarında qatnaşa almağan ide. Konstitutsiä nigezendä, deputat bulmağan keşe xökümät citäkçese bula almıy. Xäzergä, premier-ministr wazifasın Erdogannıñ urınbasarı Abdulla Gül başqara. Erdoğan saylanğan oçraqta, ul bu wazifadan kiter, dip kötelä.
