Şuşı könnärdä genä Rusiä patriarxı Aleksiy II Tatarstan prezidentı Mintimer Şäymievkä räxmät xatı yullağan. Soñğı waqıtta Tatarstan da ğına tügel, Rusiäneñ dä küp kenä mäğlümat çaralarında Çallıdağı çirkäwne cimerü turında şaqtıy zur şaw-şu qupqan ide. Älege xäbärlärgä qarağanda, Çallıda da, ğomumän Tatarstanda da, pravoslav dinen qısalar, çirkäwlärne cimerälär, möselman dinen totmawçılarnı qıyırsıtalar, digän tä'sir qala ide. Rusiä patriarxı Aleksiynıñ şuşı xaqta respublika xalqına, anıñ citäkçelegenä citkerelgän süzläre dä şaqtıy usal häm kisken ide. Läkin Çallıdağı waqiğa turında tulı häm döres mäğlümat alğaç, Rusiä patriarxı üzeneñ fikeren üzgärtkän küräseñ. Anıñ Tatarstan prezidentı isemenä yazğan soñğı xatında respublikada törle din wäkilläreneñ tınıç yäşäwe, ber-berse belän aralaşıp, dus kön itüe turında äytelä. Şulay uq anda, Çallıdağı waqiğalarğa iğtibarlı bulıp, alarnıñ çişeleşendä şäxsi qatnaşlıq kürsätkän öçen Mintimer Şäymievkä räxmät süzläre dä citkerelä. Şulay itep, ike aradağı añlaşılmawçanlıq açıqlandı. Läkin bu xaqta ällä ni şawlawçı kürenmi dä, işetelmi dä. Bigräk tä, Rusiä mäğlümat çaralarında.
