Accessibility links

Кайнар хәбәр

Tatarstanda tatar tele artıq küpme?


Añlaşıla ki, älege qanun kinät kenä küktän kilep töşmäde. Uzğan xäbärebezdä söylägänçä, äzerläw ğämälläre Tatarstanda da küptän küzätelä. Soñğı ber ğämäl näq menä älege dä bayağı qanunnı qabul itär aldınnan ğına buldı. Küptän tügel “Variant” telekanalı mäskäwlärdän kürep “Времечко” digän tapşıru açıp cibärde. Mäğnäse – turı efirda tamaşaçılar belän bergä nindider ber problema turında söyläşü. 4 fivraldä çıqqan tapşıruda balalarnı tatar häm rus tellärenä öyrätü probleması kütärelde. Tapşıruda problemanı beryaqlı ğına, yäğni Qazan mäktäplärendä tatar telen öyränügä östenlek birelä, bu rus telen öyränüne qısrıqlıy dip birügä ber tamaşaçı iğtibar itkän. Çönki misal itep, aña bik yaqın tanış 18 mäktäptäge xällärne kürsätkännär. “Времечко”ğa xaqiqätne äytergä teläp çıltıratqaç, anı efirğa birmägännär. Ä inde fikeren İntertat.ru säxifäseneñ forumına çığarğaç, berazdan rusçasın yuqqa çığarğannar. Xäzer bu fikerne tatarça ğına uqırğa mömkin.

Ğämäldä ike däwlät telendä öyrätü respublika mäktäplärendä niçek oyıştırılğan soñ? Tatarstan mäğärif ministrlığınıñ pänceşämbe könne uzğan yıllıq kollegiäsendä bu mäsälä dä kütärelde. Gärçä, räsmi xäbärlärdä yıl yomğaqlarına bağışlanğan kollegiäsendä ministr Faris Xarisovnıñ xisap dokladı sannar häm terminnar belän tutırılğan ide, dielsä dä. Ministr kübräk finans, aqça mäsälälären kütärgän. Älege kollegiä barışı turında täfsilläbräk itep aldağı xäbärlärebezdä.
XS
SM
MD
LG