Accessibility links

Кайнар хәбәр

Tatarstan Yuğarı mäxkämäse Konstitutsiäne tikşerüne kiçekterde


Tatarstan berniçä köngä suzılğan yallardan soñ 12 fevral' könne eşkä kereşte. Läkin, ällä yallar ozaqqa suzılğanğa, ällä Qorban bäyräme äle haman däwam itkängä, Qazanda da, respublikada da çärşämbe könne ällä ni zur yañalıqlar, xäbärlär turında işetelmäde. Yalsız, tänäfessez qanunnar sağında toruçılar ğına bäyrämnär dip tormadı. Çärşämbe, 12 fevral' könne, Tatarstannıñ Yuğarı mäxkämäse Rusiä Yuğarı sudı general' prokurorı urınbasarı Aleksandr Zvyaginsevnıñ Tatarstan konstitutsiäseneñ 19 matdäseneñ federal' qanunnarğa qarşı kilüen häm anıñ 18 matdäseneñ yaraqsız ikänlegen tanunı taläp itkän ğarizasın qararğa tieş ide. Bu Zvyaginsevnıñ Tatarstan mäxkämäsenä inde ikençe ğarizası. Ütkän yılnıñ üktäberendä respublikanıñ Yuğarı sudına anıñ tarafınnan respublika Konstitutsiäneñ 52 matdäse federal' qanunnarğa turı kilmi, digän ğariza inde birelgän ide. Ul waqıtta, törle tögälsezlek bulu säbäple, ğariza qabul itelmägän ide. Çärşämbe könne qaralırğa tieşle ğarizada Rusiä general' prokuraturası respublikanıñ uz grajdanlığı bulunıñ, respublikanıñ üz wäkälätläre qısalarında xalıqara häm tışqı iqtisadıy elemtälärne buldırunıñ federal' qanunnarğa turı kilmäwen tanırğa taläp itä. Şulay uq, Rusiä prokuraturası Tatarstannıñ Prezident, Däwlät Sovetı, Ministrlar Kabinetı häm Tatarstannıñ Konstitutsion Mäxqämäse eşçänlegen bilgeläwçe matdälärgä dä qarşı. Monnan tış, Zvyaginsev Tatarstan üz wäkälätläre qısalarında suverenitetqa iä buluı, respublika prezidentı ike telne belergä tieşlege kebek närsälär belän dä rizalaşa almıy. Menä şundıy möhim mäs’älälärne qararğa tieşlär ide 12 fevral' könne tatarstannıñ Yuğarı Mäxqämäsendä. Läkin Däwlät Sovetı sorawı buyınça älege eşne qaraw kiçekterelgän. Yuğarı mäxqämäneñ Zvyaginsev ğarizası buyınça kiläse utırışı 25 fevral'gä bilgelände, dip xäbär itä İntertat.ru elektron gäcite. Şulay itep, Zvyaginsev xäzer inde Rusiä general' prokurorı urınbasarı bulmasa da, ä ul bu wazifasınnan inde ber aydan artığraq elek azat itelgän ide, anıñ ğarizası buyınça eş haman däwam itä.
XS
SM
MD
LG