Rusiä jurnalistı Anna Politkovskayağa bügen, Yevropada İminlek häm Xezmättäşlek Oyışmasınıñ “jurnalizm häm demokratiä” öçen büläge tapşırıldı. Oyışmanıñ maxsus wäkile Freimut Duve, anı “Rusiäneñ vöcdanı” dip atadı. Duve, jurnalistnıñ, Rusiä xärbiläreneñ Çeçnyada qılğan vaxşilekläre turında qıyu mäqälälär yazuwın ğına tügel, ä 1999-nçı yılnıñ dikäberendä Groznıyda, 89 olı yäştäge keşegä qartlar yortınnan çığarğa yärdäm itkänen dä, iskä aldı. Büläk bügen Venada, oyışmanıñ utırışında tapşırıldı. Anıñ aqçalata küläme 20 meñ dollar. Üzeneñ cawap süzendä Politkovskaya, Çeçnyada vaxşileklär äle dä dawam itä dip äytte. Kiläse ayda Çeçnyada ütäçäk referendumnı ul küz buyaw dip atadı, häm Yevropada İminlek häm Xezmättäşlek Oyışmasın, üzen bu referendum belän bäylämäskä çaqırdı.
